Civilnet
ԱՄՆ նախագահ Դոնալդ Թրամփի հրամանագիրը էական կրճատումների է հանգեցրել ԱՄՆ Գլոբալ լրատվության գործակալությունում (USAGM)։ «Ամերիկայի ձայնի» (VOA) աշխատակիցներն ուղարկվել են վճարովի արձակուրդի, իսկ ամերիկյան ֆինանսավորմամբ գործող միջազգային երկու խոշոր հեռարձակողների՝ «Ազատ Եվրոպա/Ազատություն» ռադիոկայանի և «Ազատ Ասիա» ռադիոկայանի ֆինանսավորումը դադարեցվել է, հաղորդում է Reuters-ը։
«Ամերիկայի ձայնի» աշխատակիցները ստացել են ներքին նամակներ, որոնցում հրահանգվում է չայցելել աշխատավայր և մուտք չգործել ներքին համակարգեր։ Տուժած աշխատակիցների թիվը դեռ հայտնի չէ։ Միևնույն ժամանակ, USAGM-ը պաշտոնապես դադարեցրել է «Ազատություն» ռադիոկայանի ֆինանսավորումը, ինչպես նաև «Ազատ Ասիա» ռադիոկայանի ֆինանսավորումը, որը լրատվական գործունեություն էր իրականացնում Չինաստանի և Հյուսիսային Կորեայի համար։
Թրամփի հրամանագրով USAGM-ին ու ևս վեց դաշնային գործակալությունների հանձնարարվել է կրճատել գործունեությունը՝ հասցնելով այն օրենքով սահմանված նվազագույնի՝ պետական ապարատը կրճատելու նպատակով։ Հրամանագիրը թիրախավորում է նաև այնպիսի հաստատություններ, ինչպիսիք են Վուդրո Վիլսոնի միջազգային գիտնականների կենտրոնը, Թանգարանների և գրադարանների ծառայությունների ինստիտուտը և Փոքրամասնությունների բիզնեսի զարգացման գործակալությունը՝ պահանջելով վերացնել բոլոր ոչ օրենսդրական գործառույթները և համապատասխանաբար կրճատել անձնակազմը։
Նախկին հաղորդավար և Թրամփի ակտիվ աջակից Կարի Լեյքը նշանակվել է «Ամերիկայի ձայնի» նոր տնօրեն։ Լեյքը, որը հաճախ է քննադատել առաջատար լրատվամիջոցներին Թրամփի հանդեպ ենթադրյալ կողմնակալության համար, կոչ է արել «Ամերիկայի ձայնի» աշխատակիցներին ստուգել իրենց էլփոստը։
Խոսքի ազատության պաշտպանները խստորեն դատապարտել են այս որոշումը։ ԱՄՆ Ազգային մամուլի ակումբի նախագահ Մայք Բալսամոն զգուշացրել է, որ «Ամերիկայի ձայնի» թուլացումը «խաթարում է ազատ և անկախ մամուլի հանդեպ Ամերիկայի հանձնառությունը»։ «Լրագրողներ առանց սահմանների» կազմակերպությունն արտահայտել է նույն մտահոգությունը՝ նշելով, որ որոշումը վտանգում է մամուլի ազատությունն աշխարհում և վերացնում է ոչ ազատ միջավայրերում անկախ լրագրությանն ուղղված ԱՄՆ-ի տասնամյակների աջակցությունը։
Պահպանողականներից շատերը երկար ժամանակ մեղադրում էին «Ամերիկայի ձայն»-ին, «Ազատություն» ռադիոկայանին և պետական ֆինանսավորմամբ այլ լրատվամիջոցների ձախակողմյան կողմնակալության մեջ։ Միլիարդատեր Իլոն Մասկը՝ Թրամփի կառավարական կրճատումների նախաձեռնության կարևոր մասնակիցը, վերջերս կոչ է արել փակել «Ամերիկայի ձայնը» և «Ազատություն» ռադիոկայանը։ Նրա ղեկավարած նորաստեղծ Կառավարության արդյունավետության վարչությունը (DOGE) արդեն առաջարկել է կրճատել ավելի քան 100,000 դաշնային աշխատատեղ, սառեցնել արտաքին օգնությունը և վերացնել հազարավոր ծրագրեր ու պայմանագրեր։
Պատմություններ
