Պուտինը համաձայնել է 30 օրով դադարեցնել հարվածներն Ուկրաինայի էներգետիկ ենթակառուցվածքներին 

ՌԴ նախագահ Վլադիմիր Պուտինն ընդունել է ԱՄՆ նախագահ Դոնալդ Թրամփի առաջարկը՝ 30 օրով դադարեցնել հարվածներն Ուկրաինայի էներգետիկ ենթակառուցվածքներին։ Փոխարենը ՌԴ նախագահը մերժել է անհապաղ և լիարժեք հրադադարի առաջարկը։ Այս մասին հայտնում են ՌԴ ԱԳՆ-ից։

Մարտի 18-ին շուրջ երկու ժամ տևած հեռախոսազրույցի ընթացքում Պուտինն ու Թրամփը վերահաստատել են, որ հավատարիմ են Ուկրաինայում երկարաժամկետ խաղաղություն հաստատելու ջանքերին։

Պուտինն ասել է, որ համապարփակ զինադադարը կարող է աշխատել միայն այն դեպքում, եթե դադարեցվի ռազմական օգնությունը և հետախուզական տեղեկատվության փոխանակումն Ուկրաինայի հետ։  

Ավելի վաղ՝ մարտի 12-ին, Սաուդյան Արաբիայում ԱՄՆ-ի և Ուկրաինայի պաշտոնյաների միջև կայացած խաղաղության բանակցությունների ընթացքում Ուկրաինան ընդունել էր Միացյալ Նահանգների առաջարկած 30-օրյա հրադադարը։

ՌԴ ԱԳՆ պաշտոնական ներկայացուցիչ Մարիա Զախարովան մեկնաբանելով ԱՄՆ-ի և Ուկրաինայի բանակցությունների արդյունքները, հայտարարել էր, որ Ռուսաստանն իր դիրքորոշումը ձևավորում է ոչ թե արտասահմանում որոշ կողմերի միջև որևէ պայմանավորվածությունների կամ ջանքերի հաշվին, այլ՝ ինքնուրույն: