Civilnet
Վրաստանի ֆուտբոլի ֆեդերացիայի նախագահ Լևան Կոբիաշվիլին անընդունելի է համարել Վրաստան-Հայաստան ֆուտբոլային հանդիպումից հետո վրացի երկրպագուների պահվածքը հայ երկրպագուների նկատմամբ, հայտնում են վրացական լրատվամիջոցները։ Թբիլիսիում մարտի 23-ին անցկացված ֆուտբոլային հանդիպումից հետո մի խումբ մարդիկ մտել են խաղադաշտ և սկսել պլաստիկե և մետաղական շշեր նետել հայ երկրպագուների տրիբունաների ուղղությամբ:
«Այս բացարձակ անընդունելի արարքով մենք վիրավորեցինք հյուր թիմի երկրպագուներին և հնարավորություն չտվեցինք մեր թիմին հաղթանակը տոնել իր հավատարիմ երկրպագուների հետ: Նման գործողությունները վնասում են ֆուտբոլին և ստվեր գցում մեր երկրի միջազգային հեղինակության վրա»,- ասել է Լևան Կոբիաշվիլին:
Վրաստանի ֆուտբոլի ֆեդերացիայի նախագահի խոսքով՝ այս միջադեպը կարող է ՈւԵՖԱ-ի կողմից պատժամիջոցների առիթ դառնալ, որոնք վնաս կհասցնեն Վրաստանի ֆուտբոլի ազգային հավաքականին և վրացի ֆուտբոլասերներին: Կոբիաշվիլին շնորհակալություն է հայտնել Հայաստանի ֆուտբոլի ազգային հավաքականին և հայ երկրպագուներին ինչպես Թբիլիսիում, այնպես էլ՝ Երևանում ընկերական մթնոլորտ ստեղծելու համար։
Միջադեպի հետ կապված հայ ժողովրդից ներողություն է խնդրել նաև Վրաստանի նախկին նախագահ Սալոմե Զուրաբիշվիլին, որը ։ Ֆեյսբուքյան գրառման մեջ Զուրաբիշվիլին մասնավորապես գրել է․
«Կցանկանայի ներողություն խնդրել մեր հարևան ժողովրդից՝ որպես նախագահ, մեր որոշ ոչ քաղաքակիրթ քաղաքացիների անպարկեշտ պահվածքի համար: Մենք կանք և կլինենք բարիդրացիական պետություններ, հին քրիստոնեական հավատք կրող ազգեր և ապրելու ենք խաղաղ եվրոպական Կովկասում»,- գրել է Սալոմե Զուրաբիշվիլին:
Թբիլիսիի «Դինամո Արենա» մարզադաշտում Վրաստանի և Հայաստանի հավաքականների միջև Ազգերի լիգայի B դիվիզիոնի փլեյ-օֆֆի պատասխան խաղն ավարտվել է 6-1 հաշվով՝ Հայաստանի պարտությամբ։
Երևանում անցկացված Հայաստան Վրաստան հանդիպումը ևս ավարտվել էր Հայաստանի պարտությամբ՝ 3-0 հաշվով։
Պատմություններ
