ԱՄՆ-ն ու Ռուսաստանն այսօր համատեղ հայտարարություն կանեն բանակցությունների արդյունքներով
Civilnet
Սաուդյան Արաբիայի մայրաքաղաք Էր Ռիադում ավարտվել են Ռուսաստանի և ԱՄՆ-ի ներկայացուցիչների բանակցությունները։ Մարտի 24-ին մեկնարկած բանակցությունները տևել են ավելի քան 12 ժամ, հայտնում է «ՌԻԱ Նովոստին»։
Այս բանակցություններից մեկ օր առաջ՝ մարտի 23-ին, նույն քաղաքում հանդիպել էին Ուկրաինայի և ԱՄՆ-ի պատվիրակությունները, սակայն երեք կողմերն այդպես էլ մի սեղանի շուրջ չեն նստել, հայտնում է BBC-ն։
Ռուսաստանի և ԱՄՆ-ի պատվիրակությունները լրատվամիջոցների հետ չեն խոսել։ Գործակալության աղբյուրի համաձայն՝ կողմերը համատեղ հայտարարություն կհրապարակեն այսօր՝ մարտի 25-ին։
«ՌԻԱ Նովոստիի» զրուցակիցը նշել է նաև, որ բանակցություններից հետո Ռուսաստանի ներկայացուցիչները լավ տրամադրություն ունեին։ Ռուսական պատվիրակությունը գլխավորել է Դաշնության խորհրդի արտաքին հարաբերությունների հանձնաժողովի նախագահ Գրիգորի Կարասինը, իսկ ամերիկյան կողմը ներկայացրել է Սպիտակ տան Ազգային անվտանգության խորհրդի ավագ տնօրեն Էնդրյու Փիքը և Պետդեպարտամենտի քաղաքականության պլանավորման տնօրեն Մայքլ Էնթոնը։
Ուկրաինական պատվիրակությունը, ամերիկացիների հետ հանդիպումներից հետո չի լքել Սաուդյան Արաբիան և սպասում է Մոսկվայի և Վաշինգտոնի բանակցությունների արդյունքներին, հայտնում է ուկրաինական Rada հեռուստաալիքը։
Կիրակի օրը կայացած հանդիպումից հետո Ուկրաինայի պատվիրակության ղեկավար, պաշտպանության նախարար Ռուստեմ Ումերովը դրա արդյունքների մասին շատ ընդհանրական է խոսել։
«Զրույցը կառուցողական էր և բովանդակալից։ Մենք քննարկել ենք առանցքային հարցեր, մասնավորապես էներգետիկայի ոլորտում»,- գրել է Ումերովը՝ X-ի իր միկրոբլոգում:
Պատմություններ
