Ընկերությունը տասը տարի 8,2 մլրդ դրամի հարկ չի վճարել․ նախախաձեռնվել է քրեական վարույթ
Civilnet
Շինարարական ապրանքների առևտրով զբաղվող ընկերությունը պետությանը 8,2 մլրդ դրամի վնաս է հասցրել, հայտնում են ՀՀ պետական եկամուտների կոմիտեից։ Հաղորդագրության մեջ նշվում է, որ մի շարք շինարարական նշանակության արտադրանքների արտադրությամբ և մանրամեծածախ առևտրով զբաղվող ՍՊԸ-ն իրեն պատկանող առևտրի սրահներում չի տրամադրում ՀԴՄ կտրոններ, հետևաբար պետական բյուջե չի վճարում առանձնապես խոշոր չափերի հարկեր:
«Պարզվել է, որ տվյալ ընկերությունը 2014-2024-ի ընթացքում թաքցրել է շուրջ 27,5 մլրդ դրամի իրացման շրջանառություն: Արդյունքում, չեն հաշվարկվել և պետական բյուջե չեն վճարվել առանձնապես խոշոր չափերով՝ ընդհանուր շուրջ 8.2 մլրդ. դրամի հարկեր»,- հայտնում են ՊԵԿ-ից։
Քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում նախախաձեռնվել է քրեական վարույթ:
Նախաքննությունը և հետաքննությունը շարունակվում են` դեպքի ամբողջական հանգամանքները, հանցավոր խմբի կազմում ներգրաված անձանց ողջ շրջանակը պարզելու, նրանց նկատմամբ քրեաիրավական ներգործության միջոցներ կիրառելու, ինչպես նաև ենթադրյալ հանցագործությամբ պատճառված վնասը վերականգնելու նպատակով։
ՊԵԿ-ը տնտեսվարող սուբյեկտներին հորդորում է զերծ մնալ հարկային հաշվարկներում կեղծ տվյալներ ներառելու և իրացման շրջանառությունները թերհայտարարագրելու արատավոր երևույթից։
Թեմա
Պատմություններ
