Արևմուտքի գործիքի վերածվելն Ուկրաինայի ճակատագրին կհանգեցնի․ ՌԴ դեսպան

Հայաստանում Ռուսաստանի դեսպան Սերգեյ Կոպիրկինը վերլուծելով աշխարհաքաղաքական հակամարտությունների ազդեցությունն ինքնիշխան պետությունների վրա, Ուկրաինայի օրինակով ներկայացրել է, թե ինչպես կարող է տուժել երկիրը, երբ հայտնվում է գերտերությունների հակամարտության կիզակետում և հեռանում սեփական ազգային շահերից։ Նրա խոսքով, Ուկրաինան դարձել է արևմտյան «կործանարար աշխարհաքաղաքական սցենարների» մաս։ Դեսպանն այս մասին հայտարարել է «Արևելք–Արևմուտք դիմակայություն։ Ուկրաինական հարթություն։ Ապագայի սցենարներ» գիտաժողովի ժամանակ։

«Ուկրաինայի օրինակը հստակ ցույց է տալիս, թե ինչի կարող է հանգեցնել սեփական ազգային շահերից պետության հրաժարումը և Ռուսաստանի հետ առճակատման պայմաններում Արևմուտքի ապակառուցողական աշխարհաքաղաքական սցենարների իրականացման գործիքի վերածվելը», - ասել է Կոպիրկինը:

Ռուսաստանի դեսպանը նաև նշել է, որ Մոսկվան բաց է երկխոսության այն գործընկերների հետ, ովքեր իսկապես շահագրգռված են եվրոպական և համաշխարհային լարվածության թուլացման հարցում՝ պայմանով, որ հաշվի առնվեն Ռուսաստանի «անվտանգության օրինական պահանջները»։

Դեսպանի համոզմամբ, Ռուսաստանը մեկուսացնելու արևմտյան ջանքերն «ամբողջական ձախողում» են կրել։ Նա հավաստիացրել է, որ աշխարհի պետությունների մեծամասնությունը շարունակում է զարգացնել հարաբերությունները Ռուսաստանի հետ՝ տեսնելով նրա դերը «արդար բազմաբևեռ աշխարհակարգի» ձևավորման գործում։