Civilnet
Ֆրանսիայի Հանրապետության Եվրոպայի և արտաքին գործերի նախարար Ժան-Նոել Բարրոն Լյուքսեմբուրգում Եվրոպայի Արտաքին գործերի նախարարների հանդիպման շրջանակում լրագրողների հետ զրույցում անդրադարձել է հայ-ադրբեջանական սահմանի իրադրությանը, խաղաղության պայմանագրի ստորագրմանը, գերիների ազատ արձակման խնդրին։
«Ինչ վերաբերվում է Ադրբեջանին, ապա խորապես անհանգստացած եմ սահմանին լարվածության աճով: Իմ ցանկությունն է, որ այնտեղ (Ադրբեջանի հետ սահմանակից շրջաններում՝ խմբ․) տեղակայված եվրոպական առաքելությունն ընդլայնվի, որպեսզի կարողանա դիտարկել և զսպել լարվածությունը: Խաղաղության պայմանագիրը պետք է այժմ ստորագրվի, և կամայականորեն անազատության մեջ պահվող անձինք, գերիները պետք է ազատ արձակվեն»,- ասել է Ժան-Նոել Բարրոն: Ֆրանսիացի նախարարի հայտարարությունն X-ի իր միկրոբլոգում հրապարակել է Հայաստանում Ֆրանսիայի դեսպան Օլիվիե Դըկոտինյին։
Եվրամիության դիտորդական առաքելությունը մարտ ամսից սկսել է ավելացնել գիշերային պարեկություների քանակը հայ-ադրբեջանական սահմանի հայկական հատվածում։
Առաքելությունը հայտնել է, որ այս քայլը ձեռնարկվել է գիշերային անվտանգության և պաշտպանվածության մակարդակը բարձրացնելու, ինչպես նաև հնարավոր լարվածությունը նվազեցնելու նպատակով։
Մարտի սկզբից Ադրբեջանի ՊՆ-ն գրեթե ամենօրյա ռեժիմով հաղորդագրություններ է տարածում, թե իբր ՀՀ ԶՈՒ-ն կրակում է ադրբեջանական դիրքերի ուղղությամբ։ ՀՀ ՊՆ-ն բոլոր այդ հաղորդագրությունները հերքում է։
Մեկ ամսվա ընթացքում Ադրբեջանի զինուժը երկու անգամ թիրախավորել է Սյունիքի Խնածախ գյուղը։ Մի դեպքում բնակելի տուն է վնասվել, մյուս դեպքում՝ գյուղի մշակույթի տունը։ Երկու դեպքում էլ տուժածներ չկան։
Պատմություններ
