Civilnet
Իրանի փոխարտգործնախարար Մաջիդ Թախտե Ռավանչին հնարավոր է համարում Հայաստանի հետ ռազմավարական հարաբերությունների վերաբերյալ փաստաթղթի ստորագրումը։ Այս մասին իրանցի պաշտոնյան ասել է Regionmonitor.com-ի հետ զրույցում։
«Մենք կարծում ենք, որ պետք է մեր ջանքերը կենտրոնացնենք այդ ուղղությամբ, և կարծում եմ, որ այդ միտումը կա, երկու կողմերն էլ ցույց են տվել հետաքրքրություն այդ փաստաթղթի ուղղությամբ շարժվելու համար: Ես կարծում եմ, որ մենք պետք է աշխատենք լավ փաստաթղթի վրա, որը երկու կողմերի համար կարող է լինել ավելի լավ հենակետ՝ ռազմավարական հարաբերություններ ունենալու համար: Գուցե և ժամանակ պահանջվի լավ փաստաթուղթ պատրաստելու համար, սակայն ես հավատում եմ, որ քանի դեռ երկու կողմերն էլ ցույց են տալիս իրենց հետաքրքրվածությունը, մենք պետք է աշխատենք ավելի քրտնաջան՝ այդ նպատակին հասնելու համար»,- ասել է փոխնախարարը:
Անդրադառնալով խաղաղության պայմանագրին, Իրանի փոխարտգործնախարարը նշել է, որ «որքան շուտ Հայաստանն ու Ադրբեջանը ստորագրեն խաղաղության պայմանագիրը, այնքան ավելի լավ կլինի թե՛ երկու երկրների, թե՛ տարածաշրջանի երկրների համար»։
«Մենք չենք ցանկանում միջամտել նրանց գործերին, նրանք իրենք պետք է որոշեն, թե ինչ անել։ Մենք պետք է կենտրոնանանք ապագայի վրա։ Մենք որպես հարևան երկիր, որը լավ հարաբերություններ ունի և՛ Հայաստանի, և՛ Ադրբեջանի հետ, պատրաստ ենք ամեն բան անել, որ կարողանանք հեշտացնել այն աշխատանքը, որը պետք է իրականացվի համաձայնագիրը ստորագրելու համար։ Նրանք պետք է օգտագործեն այս հնարավորությունը»,- ասել է Մաջիդ Թախտե Ռավանչին։
Հարցին, արդյոք հավանակա՞ն է, որ Ադրբեջանը ռազմական գործողություն կսկսի Հայաստանի դեմ, իրանցի պաշտանյան ասել է․ «Մենք դեմ ենք ցանկացած սահմանային փոփոխության, մենք դեմ ենք տարածաշրջանի աշխարհաքաղաքական փոփոխությանը, ոչ մի նման սցենարի կարիքը չկա։ Պետք է թույլ չտալ, որ հակամարտության ու պատերազմը վերադառնան այս տարածաշրջան, և հույս ունենք, որ դա այդպես կլինի»։
Մանրամասները՝ սկզբնաղբյուր կայքում։
Պատմություններ
