Ռուսաստանն ու Իրանը պաշտոնապես ռազմավարական գործընկերներ են դարձել

Ռուսաստանի նախագահ Վլադիմիր Պուտինն օրենք է ստորագրել Իրանի հետ համապարփակ ռազմավարական գործընկերության մասին պայմանագրի վավերացման մասին։ Այս մասին հայտնում է ՏԱՍՍ-ը։

Համաձայնագիրը սահմանում է Մոսկվայի և Թեհրանի միջև երկարաժամկետ համագործակցության հետագա զարգացման իրավական հիմքերը։ Այն ամրապնդում է Ռուսաստանի և Իրանի՝ որպես ռազմավարական գործընկերների կարգավիճակը և ընդգրկում է բոլոր ոլորտները՝ ներառյալ պաշտպանությունը, հակաահաբեկչությունը, էներգետիկան, ֆինանսները, տրանսպորտը, արդյունաբերությունը, գյուղատնտեսությունը, մշակույթը, գիտությունը և տեխնոլոգիաները:

Համաձայնագիրը ստորագրվել է այս տարվա հունվարին Իրանի նախագահ Մասուդ Փեզեշքիանի Մոսկվա կատարած այցի ժամանակ։

Ինչպես նշել է Պետդումայի նախագահ Վյաչեսլավ Վոլոդինը, համաձայնագիրը կամրապնդի երկրների հարաբերությունները ինչպես երկկողմ համագործակցության, այնպես էլ միջազգային ասպարեզում գործողությունների համակարգման առումով։