Կենտրոնական բանկն անփոփոխ է թողել վերաֆինանսավորման տոկոսադրույքը` 6,75%

Հայաստանի Կենտրոնական բանկի խորհուրդն անփոփոխ է թողել վերաֆինանսավորման տոկոսադրույքը՝ 6,75%:

Ըստ Կենտրոնական բանկի տարածած հաղորդագրության՝ մայիսի 6-ին տեղի է ունեցել ԿԲ խորհրդի հերթական նիստը, որի ընթացքում որոշում է կայացվել անփոփոխ թողնել վերաֆինանսավորման տոկոսադրույքը՝ պահպանելով այն 6,75%:

Հաղորդվում է, որ լոմբարդային ռեպոյի, այսինքն՝ կարճաժամկետ վարկերի տոկոսադրույքը, որը Կենտրոնական բանկը տրամադրում է առևտրային բանկերին գրավի դիմաց, սահմանվել է 8,25%: Իսկ տոկոսադրույքը, որով ինքը՝ Կենտրոնական բանկն ընդունում է գումարներ առևտրային բանկերից (դա կոչվում է միջոցների ներգրավման տոկոսադրույք), կազմում է 5,25%:

Տևական ժամանակ հետևողական նվազեցումից հետո սա երկրորդ դեպքն է, որ գլխավոր դրամատուն անփոփոխ է թողնում տոկոսադրույքը: ԿԲ-ն 2023-ի հունիսից պարբերաբար իջեցնում էր վերաֆինանսավորման տոկոսադրույքը, ինչը տեղի էր ունենում տնտեսական աճի բարձր տեմպերի և գրեթե զրոյական գնաճի պայմաններում:

Այս տարվա հունվար-մարտին, նախորդ տարվա նույն ժամանակահատվածի համեմատ, գնաճը Հայաստանում կազմել է 2,5%: