Պատմության մեջ առաջին անգամ Գերմանիան կանցլեր չի ընտրել

Գերմանիայի Քրիստոնեա-դեմոկրատական և Քրիստոնեա-սոցիալական միության դաշինքի առաջնորդ Ֆրիդրիխ Մերցին չի հաջողվել հավաքել Բունդեսթագի պատգամավորների ձայների բացարձակ մեծամասնությունը՝ Գերմանիայի կանցլեր ընտրվելու համար։ Պահանջվող նվազագույն 316 ձայնից Մերցի օգտին քվեարկել է 310 պատգամավոր։ Ինչպես հայտնում է AFP գործակալությունը, սա նմանօրինակ առաջին դեպքն է Գերմանիայի Դաշնային Հանրապետության պատմության մեջ։

Մերցի թեկնածությանը դեմ է քվեարկել 307 պատգամավոր։  

Կրկնակի քվեարկությունը պետք է անցկացվի 14 օրվա ընթացքում, ինչպես սահմանված է Գերմանիայի Հիմնական օրենքով։  

Կրկնակի քվեարկության ճշգրիտ օրը դեռ հայտնի չէ։ Տեղեկատվական գործակալությունների աղբյուրների համաձայն՝ քննարկվում է նոր քվեարկությունն անցկացնել չորեքշաբթի՝ մայիսի 7-ին։ Եթե խմբակցությունները չկարողանան պայմանավորվել այդ օրվա շուրջ, որպես այլընտրանք դիտարկվում է մայիսի 9-ը։

Փետրվարին կայացած Բունդեսթագի ընտրություններում հաղթել է Քրիստոնեա-դեմոկրատական և Քրիստոնեա-սոցիալական միության դաշինքը։ Սոցիալ-դեմոկրատները զբաղեցրել են երրորդ տեղը։ Այս ուժերը միասին մեծամասնություն են կազմում Բունդեսթագում։