Նման առիթները բաց թողնելը ճիշտ չի լինի․ Փաշինյանը՝ Մոսկվա այցի մասին

Ես ընդունել եմ ՌԴ նախագահի հրավերն ու մայիսի 9-ին Մոսկվայում մասնակցելու եմ Հայրենական մեծ պատերազմում հաղթանակին նվիրված միջոցառումներին. այս մասին հայտարարել է վարչապետ Նիկոլ Փաշինյանը մայիսի 7-ին ԱԺ-ում հարցուպատասխանի ժամանակ։

Վարչապետը նշել է, որ նման այցերը բաց թողնելը ճիշտ չի լինի, քանի որ դրանց ժամանակ լինում են երկկողմ հանդիպումներ, քննարկվում են հարցեր։

Հարցին, արդյոք նման այցերն ու նման միջոցառումներին մասնակցելը չե՞ն վնասի Հայաստան-Արևմուտք հարաբերություններին, Փաշինյանը պատասխանել է․ «Մենք բալանսավորված արտաքին քաղաքականություն ենք որդեգրել, և այդ քաղաքականության մեջ չի մտնում, որ մենք այդ հարաբերությունները կառուցելու ենք ի հաշիվ այլ հարաբերությունների։ Այդ քաղաքականության տրամաբանության մեջ երբեք չի եղել, որ մենք ՌԴ այցեր չենք ունենալու, և հարաբերությունները չենք զարգացնելու և չենք խորացնելու Ռուսաստանի հետ»։

2024թ. Հայաստանի և Ադրբեջանի ղեկավարները չեն մասնակցել Մոսկվայում ավանդական շքերթին։ Փաշինյանը նշել էր, որ չի կարծում, թե ամեն տարի Հայաստանի ղեկավարը պետք է մասնակցի այդ միջոցառմանը։

Հայաստանի վարչապետը Մոսկվայում Հաղթանակի շքերթին վերջին անգամ մասնակցել է 2023 թվականի մայիսի 9-ին։