Civilnet
Իրանի ու Հայաստանի միջև հարաբերությունները շատ բարձր մակարդակի են, ինչի մասին, ի թիվս այլ հանգամանքների, վկայում են բարձր մակարդակի դիվանագիտական փոխայցելությունները, հայտարարել է Իրանի փոխարտգործնախարար Սաիդ Խաթիբզադեն «Երևանյան երկխոսություն 2025» միջազգայի համաժողովի շրջանակում լրագրողների հետ ճեպազրույցում։
Ինչ վերաբերում է խաղաղության պայմանագրն, ապա, ըստ Խաթիբզադեի՝ այն ոչ թե ընտրության հարց է, այլ անհրաժեշտություն. Իրանը պատրաստ է ցանկացած ձևով աջակցել, որպեսզի կողմերը հնարավորինս շուտ հասնեն խաղաղության։
ՍիվիլՆեթի հարցին, թե արդյոք Իրանը պատրաստվում է նաև միջնորդական առաքելությամբ հանդես գալ, Խաթիբզադեն պատասխանեց, որ Թեհրանը իր կարողությունների սահմաններում նման քայլի դիմել է դեռևս [2020] պատերազմից ի վեր՝ երկխուսություն ծավալելով Երևանի ու Բաքվի հետ, սակայն Իրանի «ամենակարևոր գործառույթներից մեկը հայկական և ադրբեջանական տեսակետների մերձեցումն ու լարվածության նվազեցումն է»։
«Եթե կարիք լինի դրանից ավելին, հանդես կգանք նաև միջնորդի դերում», հայտարարեց Խաթիբզադեն։
Իրանցի պաշտոնյան հիշեցրեց, որ Իրանի համար իր հարևանների տարածքային ամբողջականությունը կարմիր գիծ է, ուստի կարծում է, որ այդ հարցը նույն ընկալումը ունի տարածաշրջանի բոլոր կողմերի համար։
Ինչ վերաբերում է Հայաստանի առաջարկած «Խաղաղության խաչմերուկ» նախագծին՝ այն խիստ կարևոր նշանակություն ունի ամբողջ տարածաշրջանի համար, ըստ դիվանագետի։
«Իրանը ողջունում է ցանկացած նախաձեռնություն, որը կունենա գեոռազմավարական նշանակություն, սակայն չի խախտի նաև աշխարհաքաղաքական կարգերը։ Որևէ կերպ ընդունելի չեն սահմանների, աշխարհագրության փոփոխությունները»,- նշեց Խաթիբզադեն։
Պատմություններ
