ՀԱԷԿ-ում գործարկվել է 3,4 մլն դոլար արժողությամբ վարժասարք

Հայաստանում ԱՄՆ դեսպան Քրիստինա Քվինը Հայկական ատոմային էլեկտրակայանում մասնակցել է 3,4 մլն դոլար արժողությամբ գերժամանակակից վարժասարքի գործարկման միջոցառմանը։ Այս մասին հայտնում են Հայաստանում ԱՄՆ դեսպանատնից։ Ըստ հաղորդագրության, դեսպանն ասել է, որ սարքը կօգնի ապահովել Հայկական ԱԷԿ-ի անվտանգ շահագործումը։

«ԱՄՆ էներգետիկայի դեպարտամենտի և ՀԱԷԿ-ի համագործակցության արդյունքում նորագույն ամերիկյան տեխնոլոգիաների ականատեսն ենք դառնում, ինչը միջուկային էներգիայի ոլորտում Հայաստանի հետ Միացյալ Նահանգների ավելի քան 25 տարվա համագործակցության հերթական ձեռքբերումներից է»,- նշել է դեսպանը։

Մայիսի 14-ին էլ Հայաստանում Ռուսաստանի դեսպան Սերգեյ Կոպիրկինն էր այցելել ատոմակայան։ Կոպիրկինը հայտարարել էր, որ Ռուսաստանը Հայաստանին առաջարկում է միջուկային էներգաբլոկների լայն տեսականի՝ մեծ ռեակտորներից մինչև ցածր հզորության մոդուլներ։ 

Անցյալ տարվա սեպտեմբերին ՀՀ վարչապետ Նիկոլ Փաշինյանը հայտնել էր, որ Երևանը ռազմավարական որոշում է կայացրել մոդուլային ատոմակայան կառուցելու վերաբերյալ՝ հավելելով, որ նման տեխնոլոգիաներ մշակվում են Ռուսաստանում, Ֆրանսիայում և Հարավային Կորեայում։ Միևնույն ժամանակ, նա հատկապես ընդգծել էր, որ Միացյալ Նահանգները «ավելի մեծ առաջընթաց» է գրանցել այս հարցում։