Գարեգին Բ-ն ուղղակի չանդրադարձավ Փաշինյանի մեղադրանքներին
Civilnet
Հունիսի 10-ի ուշ երեկոյան բազմաթիվ մարդիկ հավաքվել էին Զվարթնոց օդանավակայանում՝ դիմավորելու Ամենայն Հայոց Կաթողիկոս Գարեգին Բ-ին, որը վերադառնում էր Արաբական Միացյալ Էմիրություններից։ Կաթողիկոսին դիմավորելու կոչով էին հանդես եկել մի շարք ընդդիմադիր գործիչներ, այդ թվում՝ Մասիսի քաղաքապետ, ՀՀԿ վարչապետի թեկնածու Դավիթ Համբարձումյանը, ինչպես նաև ԱԱԾ նախկին տնօրեն Արթուր Վանեցյանը։
Վարչապետ Նիկոլ Փաշինյանը Ամենայն Հայոց կաթողիկոսին մեղադրում է կուսակրոնության ուխտը խախտելու մեջ և պահանջում է, որ նա գահընկեց արվի։ Փաշինյանը նաև առաջարկում է, որ պետությունն ունենա վճռորոշ դեր Կաթողիկոսի ընտրության հարցում, իսկ թեկնածուներն անցնեն բարեվարքության ստուգում։
Օդանավակայանում ունեցած ճեպազրույցում Գարեգին Բ-ն, առանց ուղղակի անդրադառնալու վարչապետի հայտարարություններին, նշել է. «Թույլ չտանք, որ որևիցե կերպ մեր կյանքում տեղ գտնեն այնպիսի արարքներ ու գործողություններ, որոնք կվտանգեն մեր ազգային միասնությունը։ Մենք հավատում ենք, որ մեր միասնական ջանքերով, մեր կարողությունների մեկտեղումով պիտի կարողանանք դիմակայել բոլոր փորձություններին և հարթել մեր կյանքի բոլոր դժվարությունները լավատեսությամբ, հույսով ու հավատով կերտել մեր և մեր զավակների վաղվա պայծառ օրը»։
«Վստահ եմ՝ ճիշտ կազմակերպված դիմադրությունը կստիպի ՀՀ իշխանություններին, ինչպես նաև նրանց հովանավորներին, հետ կանգնել հերթական պիղծ մտադրությունից»,- ասել է Արթուր Վանեցյանը, որը նույնպես եկել էր օդանավակայան կաթողիկոսին դիմավորելու։
Կաթողիկոսն ԱՄԷ մեկնել էր հունիսի 9-ին՝ մեկօրյա այցով։ Նա հանդիպել է Կալկաթայի Սուրբ Նազարեթ Եկեղեցու և Հայոց Մարդասիրական ճեմարանի հոգաբարձուների հետ։
Պատմություններ
