ԱԳ փոխնախարարը Չեխիայում ներկայացրել է վիզաների տրամադրման խնդիրները

Հայաստանի արտաքին գործերի նախարարի տեղակալ Վահան Կոստանյանը Պրահայում հայտարարել է, որ կարևոր է լուծել ՀՀ քաղաքացիների համար Եվրամիության մուտքի արտոնագրերի (վիզաների) տրամադրման ընթացակարգում առկա խնդիրները։ Այս մասին Կոստանյանն ասել է Չեխիայի ԱԳ նախարարի տեղակալ Յան Մարիանիի հետ հանդիպման ընթացքում՝ շնորհակալություն հայտնելով Չեխիային՝ վիզաների ազատականացման երկխոսությանը սատարելու համար, հայտնում են ԱԳՆ մամուլի ծառայությունից։

Կողմերը քննարկել են Հայաստան-Չեխիա քաղաքական երկխոսության ներկա վիճակն ու համագործակցության ընդլայնման հնարավորությունները՝ հատկապես տնտեսական ոլորտում։ Անդրադարձ է կատարվել նաև Հայաստան-Եվրամիություն հարաբերություններին և գործընկերության խորացման հեռանկարներին։

Հանդիպման ընթացքում զրուցակիցները քննարկել են նաև Հարավային Կովկասում ընթացող զարգացումները։ Կոստանյանը ներկայացրել է Հայաստան-Ադրբեջան և Հայաստան-Թուրքիա հարաբերությունների կարգավորման ընթացքը՝ վերահաստատելով Հայաստանի պատրաստակամությունը հարևանների հետ խաղաղ կարգավորման ուղին շարունակելու հարցում։