Ճամբարակի պայթյունի զոհերի թիվը հասել է 6-ի

Ճամբարակում տեղի ունեցած պայթյունից հետո Երևանի հիվանդանոց տեղափոխված երեք տուժածներից մեկը մահացել է, հայտնում են առողջապահության նախարարությունից:

Մյուս երկու տուժածների վիճակը գնահատվում է միջին ծանրության. նրանք շարունակում են ստանալ անհրաժեշտ բուժօգնություն, նշվում է նախարարության հաղորդագրությունում:

Ավելի վաղ նախարարությունը հայտնել էր, որ հունիսի 11-ին Ճամբարակում տեղի ունեցած դեպքից հետո Երևանի բժշկական կենտրոն տեղափոխված երեք անձանցից մեկի վիճակը ծայրահեղ ծանր էր, իսկ երկուսի՝ միջին ծանրության:

Հունիսի 11-ին Գեղարքունիքի մարզի Ճամբարակ քաղաքում Գարեգին Նժդեհի փողոցի շենքերից մեկի երրորդ հարկում գազի պայթյուն է եղել։ Դրա հետևանքով փլուզվել են 4-րդ, 3-րդ և 2-րդ հարկերի բնակարանները, ինչպես նաև մասամբ՝ հարակից մուտքի բնակարանները։ Դժբախտ պատահարի հետևանքով 6 մարդ մահացել է, 10-ից ավելին՝ վիրավորվել: