Արմեն Աբազյանն ազատվել է ԱԱԾ տնօրենի պաշտոնից

Վարչապետ Նիկոլ Փաշինյանի որոշմամբ՝ Արմեն Աբազյանն ազատվել է Ազգային անվտանգության ծառայության տնօրենի պաշտոնից։ 

Ազգային անվտանգության ծառայության տնօրենի պարտականությունների կատարումը ժամանակավորապես վերապահվել է ազգային անվտանգության ծառայության տնօրենի տեղակալ Անդրանիկ Սիմոնյանին:

Արմեն Աբազյանը ԱԱԾ տնօրենն էր 2020-ի նոյեմբերի 8-ից։

Լրատվամիջոցների հրապարակումների համաձայն՝ Աբազյանի ազատման պատճառը կապված է նախօրեին գործարար Սամվել Կարապետյանի դեմ իրավապահների գործողությունների հետ։ Հունիսի 17-ին Կարապետյանը իր աջակցությունը հայտնեց Ամենայն հայոց կաթողիկոսին և հայտարարեց, որ ինքը եկեղեցու կողքին է, «եթե քաղաքական գործիչները չկարողանան, մենք մեր ձևով կանենք»։ Այդ հայտարարությանը հետևեցին վարչապետ Նիկոլ Փաշինյանի՝ Կարապետյանին ուղղված գրառումները Ֆեյսբուքում, ինչին էլ հաջորդեց իրավապահների խուզարկությունը Սամվել Կարապետյանի երևանյան առանձնատանը։ Կեսգիշերն անց Կարապետյանը փոխոստիկանապետի ուղեկցությամբ տարվել է ոստիկանություն։

Լրատվամիջոցների հրապարակումների համաձայն՝ ԱԱԾ-ն չի միացել ոստիկանության գործողություններին, ինչը և դարձել է Աբազյանի պաշտոնանկության պատճառը։

Ամենայն Հայոց կաթողիկոս Գարեգին Բ-ն մայիսի 24-ին Ժնևում մասնակցել էր Արցախի ժողովրդի իրավունքների հարցերով համաժողովի, ինչից հետո Փաշինյանը քննադատական հարձակումներ սկսեց նրա նկատմամբ՝ բարձրաձայնելով նրա՝ կուսակրոնության ուխտը խախտելու մասին։ Ավելի ուշ Փաշինյանը սկսեց պահանջել, որ Գարեգին Բ-ն ազատի վեհարանը։

Տե՛ս նաև՝ Ուզում էին շոու անել ու ինձ ձերբակալել, հասարակ մարդիկ հակահարված տվեցին․ Սամվել Կարապետյան