Civilnet
Կարմիր Խաչի միջազգային կոմիտեի (ԿԽՄԿ) նախագահ Միրյանա Շպոլյարիչը հանդես է եկել զգուշացմամբ՝ Մերձավոր Արևելքում սրվող ռազմական գործողությունների ֆոնին, ընդգծելով, որ իրավիճակը կարող է վերածվել ամբողջ տարածաշրջանն ու աշխարհը ընդգրկող պատերազմական ճգնաժամի։
«Աշխարհը չի կարող անվերջ պատերազմ կրել։ Միջազգային մարդասիրական իրավունքի պահպանումը կամքի հարց չէ, այլ պարտավորություն է։ Քաղաքացիական բնակչությունը պետք է զերծ մնա ռազմական գործողություններից, իսկ բուժանձնակազմը՝ ներառյալ Իրանի Կարմիր մահիկի և Իսրայելի Մագեն Դավիդ Ադոմի աշխատակիցները, պետք է ունենան անվտանգ պայմաններ փրկարար աշխատանք կատարելու համար»,- ասված է Շպոլյարիչի հայտարարությունում։
ԿԽՄԿ-ն հայտնում է, որ ունի ներկայություն թե՛ Իրանում, թե՛ Իսրայելում և ակտիվացնում է թիմերն ու ռեսուրսները՝ աճող մարդասիրական կարիքներին արձագանքելու համար։ Սակայն շեշտվում է, որ մարդասիրական որևէ արձագանք չի կարող փոխարինել քաղաքական կամքին՝ հանուն խաղաղության, կայունության և մարդկային կյանքի։
Իրավիճակը տարածաշրջանում կտրուկ սրվել է ԱՄՆ նախագահ Դոնալդ Թրամփի հրամանով հունիսի 21-ին Իրանի երեք միջուկային օբյեկտների՝ Նաթանզի, Սպահանի և Ֆորդոյի վրա իրականացված հարձակման ֆոնին։ Թրամփը հայտարարել է, որ հարվածներն «առաջնակարգ ռազմական հաջողություն» են եղել և զգուշացրել է, որ եթե Թեհրանը չհամաձայնի խաղաղության, ապա կհետևեն նոր՝ ավելի կործանարար հարվածներ։
Հաղորդվում է, որ հարձակման ժամանակ կիրառվել են բունկերային ռումբեր և Tomahawk թևավոր հրթիռներ, իսկ Ֆորդոյի ստորգետնյա օբյեկտը ենթարկվել է ուղղակի ավերումի։ Հարվածները տեղի են ունեցել ԱՄՆ-ի և Իսրայելի միջև համակարգված գործողությունների շրջանակում։
Կարմիր Խաչի միջազգային կոմիտեն չեզոք, անկողմնակալ և անկախ կազմակերպություն է, որի բացառապես մարդասիրական առաքելությունը բխում է 1949թ․ Ժնևյան կոնվենցիաներից։ Այն աջակցում է զինված հակամարտությունների և բռնության հետևանքով տուժած մարդկանց՝ պաշտպանելով նրանց կյանքն ու արժանապատվությունը, և համագործակցում է Կարմիր խաչի և Կարմիր մահիկի համաշխարհային ցանցի գործընկերների հետ։
Պատմություններ
