Միքայել Սրբազանին կալանավորելու միջնորդություն կներկայացվի դատարան

Միքայել արքեպիսկոպոս Աջաապահյանին կալանավորելու միջնորդություն կներկայացվի դատարան։ Այս մասին հայտնել են նրա փաստաբանները։

Փաստաբան Արա Զորհաբյանը գրառմամբ հայտնել է, որ դատարանը նրան ձերբակալելու պահից 24 ժամվա ընթացքում պետք է որոշում կայացնի` հավելելով, որ դատական նիստի վայրի ու ժամի մասին հավելյալ կտեղեկացնի։

Փաստաբանը հրապարակել է նաև Սրբազանի նամակը, որտեղ նա խնդրում է իր անունը չշահարկել վարչապետի թեկնածուների շարքում՝ հավելելով, որ լիովին բավարարված է իր հոգևոր ծառայությամբ։

«Հայաստան» խմբակցությունը հայտարարել էր, որ միանում է Միքայել Սրբազանի թեկնածությամբ անվստահության նախաձեռնությանը։

Հունիսի 27-ի առավոտյան ուժայինները փորձել էին Մայր Աթոռ Սուրբ Էջմիածնի տարածքից բերման ենթարկել Միքայել արքեպիսկոպոս Աջապահյանին, բայց տարածքում հավաքված բազմաթիվ քաղաքացիներ թույլ չեն տվել։ Որոշ ժամանակ անց ուժայինները հեռացել են տարածքից։ Միքայել արքեպիսկոպոս Աջապահյանն այնուհետև ինքնակամ ներկայացել է Քննչական կոմիտե։

Ըստ Քննչական կոմիտեի՝ արքեպիսկոպոս Աջապահյանը մեղադրվում է ՀՀ քրեական օրենսգրքի 422-րդ հոդվածի 2-րդ մասով նախատեսված հանցագործության մեջ, այն է՝ զանգվածային լրատվության միջոցների և տեղեկատվական տեխնոլոգիաների օգտագործմամբ իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր կատարելը։