ՀԷՑ-ի ղեկավարն ընկերության շուրջ կատարվողը համեմատում է «խելագարության կանխավարկածի» հետ

ՀԷՑ-ի գլխավոր տնօրենի պաշտոնակատար Դավիթ Ղազինյանն ընկերության պետականացման գործընթացը համեմատում է «խելագարության կանխավարկածի» հետ։ «Ինձ հարց տվեց լրագրողը, ասում է՝ դուք կանխատեսո՞ւմ էիք, որ հնարավոր է այսպիսի գործընթաց։ Մենք չենք պատրաստվում խելագարության կանխավարկածով առաջնորդվել»,- այսօր Երևանում հրավիրված ասուլիսին հայտարարեց նա։ «Անցած տարիների ընթացքում որևիցե ձևով անգամ ակնարկ չի եղել, որ ձեզ մոտ այնպիսի վիճակ է, որը կարող է բերել լիցենզիայից զրկելուն»։

Ղազինյանը ներկայացրեց ՀԷՑ-ում 2015-ից ի վեր իրականացված բարեփոխումները։ «2015 թվականից սկսած KPMG կազմակերպությունը ամեն տարի մեզ մոտ անցկացրել է աուդիտ, հարկային ստուգումները 2018-22 թվականներին ընկերությունում ավարտվել են զրոյական ակտով»,- ասաց նա։ Նա նշեց, որ ՀԷՑ-ի աուդիտը անցկացրել են միջազգային հեղինակություն ունեցող GT և BDO Armenia ընկերությունները։ «Այս կազմակերպությունները անցկացրել են և՛ ֆինանսական, և՛ տեխնիկական աուդիտ և տվել են դրական եզրակացություն»,- ասաց նա՝ հավելելով, որ կազմակերպություններին ընտրել է ՀԾԿՀ-ն՝ իրենց համաձայնությամբ։
«Հանրային ծառայությունները կարգավորող հանձնաժողովը այն մարմինն է, որը ծրագրավորում է մեր ոլորտը։ Մենք առաջնորդվում ենք իրենց կայացրած որոշումների, իրենց՝ մեզ համար սահմանած չափորոշիչներով։ Անցած տարիների ընթացքում որևիցե ձևով անգամ ակնարկ չի եղել, որ ձեզ մոտ այնպիսի վիճակ է, որը կարող է բերել լիցենզիայից զրկելուն»։ 

Ըստ Ղազինյանի՝ ՀԾԿՀ-ի վերլուծությամբ, 2023-ին ՀՀ ամբողջ տարածքում հոսանքազրկումների հաճախականության միջին ցուցանիշը նախորդ տարվա համեմատ բարելավվել է 8.7 տոկոսով, իսկ հոսանքազրկումների վերականգման միջին տևողությունը՝ 18.1 տոկոսով։ 

«Այդ մարմինը [ՀԾԿՀ] երբևիցե որևիցե ձևով չի գնահատել ՀԷՑ-ի աշխատանքը այնքան վատ, որը կարող է հանգեցնել այսպիսի զարգացումների»։

Նրա խոսքով՝ ՀԷՑ-ի 2023 թվականի ներդրումային ծրագիրը կատարվել է 91.8%-ով, որը  բավական բարձր և լավ ցուցանիշ է։ 

«Հանրային ծառայությունները կարգավորող հանձնաժողովը ծախսերը ընդունելուց ֆիքսում է ներդրումային ծրագիրը, ֆիքսում է, այսպես ասած, իր կողմից ոչ ընդունելի ծախսերը»,- ասաց  Ղազինյանը՝ նշելով, որ ՀԾԿՀ-ի կողմից չի եղել դիտարկում որևէ ոչ նպատակահարմար ծախսի վերաբերյալ։

Լրագրողի հարցին ի պատասխան՝ Ղազինյանն ասաց, որ ՀԷՑ-ի պետականացման օրենսրդական փաթեթը «անգրագետ օրենքի նախագիծ» է։ 

Նա նշեց, որ պետական մարմինները իրենց մոտ երբևէ որևէ լուրջ խնդիր չեն տեսել. «Երբ որ այսպիսի գործընթաց է նախաձեռնվում, և այն ընկերությունը, որին փորձում են պետականացնել, յուրաքանչյուր բառ այդտեղ տեղին է»։ 

ՀԷՑ-ի ղեկավարի խոսքով՝ պետականացման հարցում «խելագարության կանխավարկածի խնդիր կա»։ «Ինձ հարց տվեց լրագրողը, ասում է՝ դուք կանխատեսո՞ւմ էիք, որ հնարավոր է այսպիսի գործընթաց,- ասաց Ղազինյանը և հավելեց։- Մենք չենք պատրաստվում խելագարության կանխավարկածով առաջնորդվել»։ «Չնայած մեր դեմ պայքար է տարվում ոչ օրինաչափ, այսպես ասած՝ առանց կանոնների մարտի ձևաչափով, մենք պատրաստվում ենք բոլոր իրավական ճանապարհներով պայքարել այս գործընթացի դեմ»,- ասաց Ղազինյանը՝ նշելով, որ ներպետական ատյաններից բացի դիտարկում են միջազգային ատյաններ դիմելու հարցը։ 

«Բոլոր իրավական ճանապարհներով [պայքարելու ենք], ունենք ուժեղ իրավաբանական թիմ, մենք ճիշտ ենք, իսկ ճիշտ լինելը մարդուն ուժեղացնում է մի քանի անգամ»,- ասաց նա։ Ղազինյանը չցանկացավ մանրամասնել, թե ինչ ճանապարհով ու ինչ ռազմավարությամբ են պայքարը շարունակելու։

ՀԷՑ-ն ազգայնացնելու մտադրության մասին Փաշինյանն առաջին անգամ հայտնեց այն բանից հետո, երբ հունիսի 17-ին ռուսաստանաբնակ գործարար Սամվել Կարապետյանը մի հարցազրույցում իր աջակցությունը հայտնեց Հայ առաքելական եկեղեցուն և Ամենայն Հայոց կաթողիկոսին, որին Փաշինյանը փորձում է գահընկեց անել։ Իրավապահները նախ խուզարկեցին Կարապետյանի երևանյան առանձնատունը, նրա բերման ենթարկեցին, ապա դատարանը նրան կալանավորեց երկու ամսով։ Փաշինյանը հայտարարեց Կարապետյանին պատկանող Հայաստանի էլեկտրական ցանցեր (ՀԷՑ) ընկերությունը ազգայնացնելու իր մտադրության մասին։