Ժամկետային զինծառայողների արձակուրդի ժամկետները երկարացվեցին

Պարտադիր ժամկետային զինծառայողների արձակուրդի ժամկետները երկարացվեցին։ Համապատասխան օրենքի նախագիծն այսօր ԱԺ-ն երկրորդ ընթերցմամբ և ամբողջությամբ ընդունեց: Նախագծին կողմ քվեարկեց՝ 62, դեմ՝ 0, ձեռնպահ` 25 պատգամավոր։

Այսուհետ պաշտպանության նախարարի հրամանով սահմանված զորամասերում (մարտական հերթապահություն իրականացնող) զինծառայողները կստանան արձակուրդ՝ 30 օր ժամկետով, մյուս զորամասերի զինծառայողները՝ 21 օր ժամկետով, ընդհանուր ծառայության ընթացքում՝ հավասար մասերով:

Արձակուրդների ժամկետի ավելացումը տարածվելու է նաև ներկայումս պարտադիր ժամկետային ծառայության մեջ գտնվողների վրա՝ արդեն իսկ ստացած արձակուրդի ժամկետի և ավելացված ժամկետի դրական տարբերության չափով:

Բացի այդ, զինվորական երդման կապակցությամբ սահմանվել է լրացուցիչ արձակուրդ՝ 2 օր ժամկետով:

Փոփոխությունները վերաբերում են նաև սպայական կազմին։ Ռազմաուսումնական հաստատությունն ավարտած և երկարաժամկետ պայմանագիր կնքած սպաները կկարողանան օգտվել պետական աջակցությամբ հիփոթեքային վարկավորման նպատակային ծրագրից։ Մինչդեռ, եթե զինծառայողը վաղաժամկետ արձակվի ծառայությունից (բացառությամբ հիվանդության կամ ծառայողական պարտականությունների հետևանքով առաջացած հիմքերի), նա պարտավոր կլինի պետությանը վերադարձնել մինչ այդ իրականացված վճարումների ամբողջ գումարը։

Օրենքը հետադարձ ուժ ունի։ Արձակուրդի մասով այն կտարածվի նաև մինչև օրենքի ուժի մեջ մտնելն արձակուրդ ստացած զինծառայողների վրա, իսկ հիփոթեքային ծրագիրը կգործի 2022-ի հուլիսի 1-ից հետո ռազմաուսումնական հաստատություն ընդունված կուրսանտների համար։