Civilnet
Հուլիսի 10-ին Աբու Դաբիում կայացած երկկողմ հանդիպման ժամանակ Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը քննարկել են Հայաստան-Ադրբեջան միջպետական հարաբերությունների կարգավորման օրակարգի տարբեր ասպեկտներ։ Հայտնում են Հայաստանի ԱԳ նախարարությունից։
Ըստ պաշտոնական հաղորդագրության՝ կողմերը հաստատել են, որ երկկողմ բանակցությունները հարաբերությունների կարգավորման գործընթացի բոլոր հարցերն արդյունավետորեն հասցեագրելու ամենաարդյունավետ ձևաչափն են։ Այդ հիմքով պայմանավորվածություն է ձեռք բերվել շարունակել արդյունքին միտված երկխոսությունը։
Քննարկվել է նաև սահմանազատման գործընթացում գրանցված առաջընթացը։ Երկու երկրների ղեկավարները հանձնարարել են համապատասխան պետական հանձնաժողովներին շարունակել գործնական աշխատանքը այդ ուղղությամբ։
Փաշինյանն ու Ալիևը նաև պայմանավորվել են շարունակել երկկողմ բանակցությունները և վստահության ամրապնդման միջոցները։
Հայաստանի և Ադրբեջանի ղեկավարները շնորհակալություն են հայտնել ԱՄԷ նախագահ շեյխ Մուհամմադ բին Զայեդ Ալ Նահյանին՝ ջերմ հյուրընկալության և երկկողմ հանդիպման կազմակերպման համար։
Հանդիպման արդյունքների մասին նույնաբովանդակ հաղորդագրություն է տարածել նաև Ադրբեջանի ԱԳՆ-ն։
Պատմություններ
