Civilnet
Թուրքիայում արգելված և ահաբեկչական կազմակերպություն ճանաչված Քրդստանի աշխատավորական կուսակցությունը (PKK) այսօր սկսել է զինաթափման գործընթացը՝ նշանավորելով Թուրքիայի հետ երկարատև հակամարտության ավարտը։ Այս մասին հայտնում է Al Jazeera-ն։ Այսօր Իրաքի հյուսիսում անցկացվել է խորհրդանշական արարողություն, որի ընթացքում 20-ից 30 մարտիկներ ոչնչացրել են իրենց զենքերը։ Զինաթափման գործընթացն ուղիղ հեռարձակմամբ ցուցադրել են թուրքկան և այլ յութուբյան ալիքներով։
Սա պատմական քայլ է՝ քառասուն տարվա հակամարտությունից խաղաղ ճանապարհով դուրս գալու համար։ Զինաթափման գործընթացն իրականացվում է խիստ հսկողության պայմաններում և կշարունակվի ամռան ընթացքում։
Թուրքիայի նախագահ Ռեջեփ Թայիփ Էրդողանը ողջունել է PKK-ի զինաթափումը՝ այն բնութագրելով որպես «Թուրքիայի ոտքերին դրված արյունոտ շղթաները լիովին պոկելու և դեն նետելու քայլ»։ Էրդողանն ընդգծել է, որ այս քայլը շահեկան կլինի ամբողջ տարածաշրջանի համար։
Մայիսի սկզբին Քրդստանի աշխատավորական կուսակցությունը հայտարարել էր լուծարման մասին։
PKK-ն Թուրքիայում, Եվրոպական միությունում և Ամերիկայի Միացյալ Նահանգներում դասվել է «ահաբեկչական» կազմակերպությունների շարքին։
1984-ից մինչև 2024-ը տեղի ունեցած հակամարտության հետևանքով ավելի քան 40,000 մարդ է զոհվել, և հազարավոր քրդեր, փախչելով հարավարևելյան Թուրքիայի բռնություններից, տեղափոխվել են հյուսիսային քաղաքներ։
Պատմություններ
