ՀԱԷԿ-ը միացվել է Հայաստանի միասնական էներգահամակարգին

Պլանային նախազգուշացնող վերանորոգման աշխատանքներից հետո, hուլիսի 13-ին Հայաստանի ատոմային էլեկտրակայանի թիվ 2 էներգաբլոկի 3-րդ տուրբագեներատորը միացվել է Հայաստանի միասնական էներգահամակարգին։ Այս մասին հայտնում են ՀԱԷԿ–ի մամուլի ծառայությունից։

«Այս պահին ԱԷԿ-ը գործում է բնականոն ռեժիմով՝ անվտանգության և հուսալիության բոլոր չափանիշների պահպանմամբ»,- ասված է հաղորդագրության մեջ։

Պլանային վերանորոգման համար Հայկական ատոմային էլեկտրակայանը մայիսի 15-ից դադարեցրել էր աշխատանքը երկու ամսով։

Ավելի վաղ կայանի գլխավոր տնօրենի առաջին տեղակալ Մովսես Վարդանյանը հայտնել էր, որ կայանում նախատեսված է մի քանի համակարգերի փոփոխություն։ Մասնավորապես՝ պետք է փոխվեին տուրբինային արտադրամասի ավտոմատ կառավարման համակարգերը, գեներատորների և տրանսֆորմատորների պաշտպանության համակարգերը, ինչպես նաև՝ ցածր լարման վթարային անջատման համակարգը (6 և 0.4 կՎ):

Պաշտոնական տվյալներով ՀԱԷԿ-ը 2024-ին արտադրել է 2,8 մլն կՎտ․ժ էլեկտրաէներգիա` մոտ 6% ավելի՝ նախատեսված պլանից:
ՀԱԷԿ-ի՝ 400 Մվտ հզորությամբ մեկ էներգաբլոկի շահագործման ժամկետն ավարտվում էր 2016-ին։ Վերազինումից հետո ներկայում շահագործման ժամկետը երկարաձգվել է մինչև 2036-ը՝ ևս երեք տարի ավելացնելու հնարավորությամբ։ ՀԱԷԿ-ը ներկայում ապահովում է Հայաստանում արտադրվող էլեկտրաէներգիայի մոտ ⅓-ը։