ԵՄ-ի ծրագիրը ռազմավարական ներդրում է Հայաստանի ապագայի համար․ Ուրսուլա ֆոն դեր Լայեն

Եվրոպական հանձնաժողովի նախագահ Ուրսուլա ֆոն դեր Լայենը X սոցիալական ցանցում գրառում է արել Հայաստանի վարչապետ Նիկոլ Փաշինյանի հետ Բրյուսելում հանդիպումից հետո։ «Հաճելի է կրկին ողջունել Ձեզ Բրյուսելում, սիրելի Նիկոլ Փաշինյան։

Դուք ցուցադրել եք Հայաստանի խորին հանձնառությունն առ խաղաղություն և կայունություն։
Քանի որ մեր կապերն ավելի են սերտանում՝ ԵՄ-ի Դիմադրողականության և աճի ծրագիրը ռազմավարական ներդրում է Հայաստանի ապագայի համար», - գրել է Ուրսուլա ֆոն դեր Լայենը։

Այսօր՝ հուլիսի 14-ին, Բրյուսելում տեղի է ունեցել Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Անտոնիու Կոշտայի և Եվրոպական հանձնաժողովի նախագահ Ուրսուլա Ֆոն դեր Լայենի եռակողմ հանդիպումը:

Հանդիպման արդյունքներով ընդունվել է մամուլի համատեղ հաղորդագրություն, որում նշվում է, որ 2024 թվականի ապրիլին հայտարարված 270 մլն եվրո արժողությամբ «Դիմակայունություն և աճ» ծրագիրը 50%-ով մեծացրեց ԵՄ-ի կողմից Հայաստանին տրամադրվող ֆինանսավորումը: Ներդրումները խթանելուն միտված 200 մլն եվրոյի դրամաշնորհային օգնությամբ և 70 մլն եվրոյի դրամաշնորհային ֆինանսավորմամբ՝ այն շարունակում է աջակցել Հայաստանի սոցիալ-տնտեսական բարեփոխումների օրակարգին, ավելի սերտ ոլորտային համագործակցությանը և էներգետիկայի, տրանսպորտի և մասնավոր հատվածներում ներդրումներին: