Հայաստանցիների 47 տոկոսը կաջակցի Հայաստանի և Ադրբեջանի միջև խաղաղության պայմանագրի ստորագրմանը

Հայաստանում հարցվածների 47 տոկոսը լիովին կամ ավելի շուտ կաջակցի Հայաստանի և Ադրբեջանի միջև խաղաղության պայմանագրի ստորագրմանը։ Հարցվածների 40 տոկոսը միանշանակ կամ ավելի շուտ դեմ է արտահայտվել պայմանագրի ստորագրմանը։

Այս տվյալները Միջազգային հանրապետական ինստիտուտի (IRI) կողմից 2025-ի հունիսի 16-26-ն անցկացված հարցումից են։ Հարցումն իրականացվել է 18 տարին լրացած 1,505 ՀՀ քաղաքացիներից և Լեռնային Ղարաբաղից բռնի տեղահանված ԼՂ նախկին բնակիչներից, որոնք այժմ բնակվում են Հայաստանում։ 

Հարցին, թե որոնք են խաղաղության պայմանագրի ստորագրման հիմնական առավելությունները, պայմանագրի ստորագրմանն աջակցող հարցվածները  նշել են

• Խաղաղության հաստատում տարածաշրջանում (74%),
• Տնտեսական զարգացում (9%),
• Տարածքային ամբողջականության ճանաչում, սահմանազատում (8%),
• Ճանապարհների ապաշրջափակում (6%)։

Որպես խաղաղության պայմանագրի ստորագրման հիմնական թերություն խաղաղության պայմանագրին դեմ արտահայտված հարցվածները նշել են՝

• Անվտանգության խնդիրներ, պատերազմի վտանգ (20%),
• Տարածքների զիջում Ադրբեջանին (16%),
• Վստահության պակաս (10%)։
• Համաձայնագրի պայմանները փելադրվում են միայն Ադրբեջանի կողմից (7%)
• Ցեղասպանության վտանգ, Հայաստանի կորուստ (5%)
• Ադրբեջանի ազատ ելումուտը Հայաստան (5%)
• Հարցվածների 3 տոկոսն էլ կարծում է, որ համաձայնագրի պայմանները չեն պահպանվի։