Հայաստանում յուրաքանչյուր 4-րդ երեխան ավելորդ քաշ ունի․ պետությունը կպայքարի դրա դեմ

2026-ին ուժի մեջ կմտնի նախադպրոցական ուսումնական հաստատություններում սննդի կազմակերպման նոր նորմատիվը։ 

Առողջապահության նախարարությունից հայտնում են, որ Հայաստանում երեխաների շրջանում դիտվում է գերքաշության ցուցանիշի աճի միտում: Ուստի, վերանայվել է նախադպրոցական ուսումնական հաստատություններում սննդի կազմակերպման նորմատիվը` բարելավելով երեխաների համար սննդամթերքի միջին օրաբաժնի օրինակելի հավաքակազմը:

Իրականացված հիմնական փոփոխություններն են.

- Արդիականացվել են սննդանյութերի և էներգիայի օրական ֆիզիոլոգիական պահանջի նորմերը:

- Ավելացվել է ամբողջահատիկ պարունակող սնունդ (ամբողջահատիկ ցորենից հաց, ամբողջահատիկ ցորենից մակարոնեղեն, հնդկաձավար, վարսակ, բլղուր, հաճար և այլն):

- Շաքարի միջին օրաբաժինը նվազեցվել է ավելի քան 2 անգամ: Թույլ է տրվում օգտագործել ոչ ավելի, քան 5 գրամ շաքար կամ մեղր պարունակող ըմպելիք (ներառյալ` հյութեր, կակաո և այլն):

-Թույլատրվում է որպես խորտիկ տրամադրել բանջարեղեն և միրգ` առանց ավելացված շաքարի:

Չի թույլատրվում.

կրեմային հրուշակեղեն,

քաղցրացուցիչներ պարունակող սննդամթերք,

շոկոլադ,

շոկոլադապատ արտադրանք,

աղանդեր (բացառությամբ` յոգուրտի կամ մրգային հիմքով աղանդերի, որոնք պարունակում են առնվազն 50% միրգ),

կոֆեին պարունակող ըմպելիքներ (այդ թվում` թեյ): 

-Նվազեցվել է օգտագործվող աղի քանակը. միջին օրաբաժինը` ավելի քան 2 անգամ. 

-ցանկացած այլ համեմունք թույլատրվում է տրամադրել սահմանափակ չափաբաժիններով:

-Ավելացվել են թարմ մրգերի, հատապտուղների, բանջարեղենի, մշակաբույսերի, այդ թվում` չորամրգերի առկայությունը սննդակարգում:

Առողջապահության համաշխարհային կազմակերպության տվյալներով 2022-ի տվյալներով՝ մինչև 5 տարեկան շուրջ 37 մլն երեխա ունեցել է ավելցուկային քաշ կամ ճարպակալում։

2019-ին «Արաբկիր» բժշկական համալիրը Հայաստանում իրականացրել է հետազոտություն՝ ընդգրկելով պատահական ընտրանքով 7-8 տարեկան աղջիկների և տղաների Հանրապետությունից: Հետազոտության արդյունքներով՝ երեխաների 27,7 տոկոսը կամ յուրաքանչյուր չորրորդ երեխան ավելորդ քաշ ունի, իսկ 12,5 տոկոսի մոտ արձանագրվել է ճարպակալում։