Ռուսաստանը մտահոգված է ԵԱՏՄ-ի համատեքստում Հայաստանի որոշումներով․ Օվերչուկ
Civilnet
Ռուսական կողմը մտահոգություն է հայտնել Հայաստանի որոշումների վերաբերյալ, մասնավորապես՝ սննդամթերքի ներմուծման հարցում, որն ըստ Մոսկվայի՝ չի համապատասխանում Եվրասիական տնտեսական միության (ԵԱՏՄ) սերտիֆիկացման ստանդարտներին։ Այս մասին հուլիսի 24-ին լրագրողներին հայտնել է Ռուսաստանի փոխվարչապետ Ալեքսեյ Օվերչուկը, հայտնում է ՌԻԱ Նովոստին։
«Կան որոշ կառավարական ակտեր, որոնք մեզ մոտ հարցեր են առաջացնում։ Մասնավորապես, խոսքը վերաբերում է Եվրամիության, Ամերիկայի Միացյալ Նահանգների և այլ երկրների չափանիշներին համապատասխան հավաստագրված սննդամթերքի ընդունմանը, որոնք չեն համապատասխանում Եվրասիական տնտեսական միության հավաստագրմանը։ Իհարկե, մենք մտահոգություն ենք հայտնում նման հարցերի վերաբերյալ», - նշել է Ռուսաստանի փոխվարչապետը։
Ռուսաստանի վարչապետ Միխայիլ Միշուստինը և Հայաստանի վարչապետ Նիկոլ Փաշինյանն այսօր՝ հուլիսի 24-ին, հանդիպել են Ալթայի Հանրապետությունում անցկացվող Միջազգային էկոլոգիական համաժողովի շրջանակում։ Օվերչուկի խոսքով՝ հանդիպման ընթացքում քննարկվել են երկկողմ առևտրատնտեսական հարաբերությունների զարգացման հարցեր։
Լրագրողներից մեկը հետաքրքրվել է՝ արդյոք քննարկվել է վարչապետ Փաշինյանի՝ Եվրամիությանը միանալու հնարավոր ցանկությունը։ Օվերչուկը պատասխանել է, որ խոսքը «ԵՄ-ին անդամակցելու անփոփոխ ցանկության» մասին չէ։
«Մենք, իհարկե, քննարկում ենք համագործակցությունը ԵԱՏՄ շրջանակներում և այս տեսանկյունից հետևում ենք իրավական դաշտում ՀՀ կառավարության կողմից ընդունվող որոշումներին», - նշել է նա։
Պատմություններ
