Գերմանիայի դեսպանի հետ քննարկվել է վիզաների ազատականացման հարցը

ԱԺ Հայաստան-Գերմանիա բարեկամական խմբի ղեկավար Վլադիմիր Վարդանյանն ու Հայաստանում Գերմանիայի արտակարգ և լիազոր դեսպան Կլաուդիա Բուշն անդրադարձել են Հայաստանի քաղաքացիների համար Եվրամիության վիզաների ազատականացման հարցը: Այս մասին հայտնում են Ազգային ժողովի մամուլի ծառայությունից։

Վլադիմիր Վարդանյանը կարևորել է հայ-գերմանական հարաբերությունների զարգացումը` նշելով, որ դրանք ունեն ակտիվ և դինամիկ ընթացք:

Կողմերն ընդգծել են միջխորհրդարանական կապերի խորացման անհրաժեշտությունը: Դեսպանը հույս է հայտնել, որ սեպտեմբերին իր երկրի նորընտիր խորհրդարանում կձևավորվի Գերմանիա-Հայաստան բարեկամական նոր խումբ: Այս համատեքստում կարևորվել են նաև խորհրդարանների միջև փոխայցերը:

Հանդիպման մասնակիցները խոսել են տնտեսական, մշակույթի և զբոսաշրջության ոլորտներում համագործակցությանը վերաբերող հարցերի մասին:  

Դեսպանը վերահաստատել է իր հանձնառությունը` աջակցելու երկու երկրների միջև հարաբերությունների զարգացմանը: