Կառավարությունը խոստանում է 1,7 անգամ ավելացնել արտահանումը մինչև 2030-ը

Կառավարությունը հուլիսի 31-ին հաստատեց արտահանման խթանման 2025-2030-ի ռազմավարությունը  և դրա կատարումն ապահովող գործողությունների ծրագիրը։

Էկոնոմիկայի նախարար Գևորգ Պապոյանը ասաց, որ ռազմավարությունը բաղկացած է հինգ հենասյուներից ու դրանց իրագործմանը միտված 50-ից ավելի միջոցառումներից։

«Ծրագրի իրականացման համար նախատեսվում է ծախսել շուրջ 98 մլրդ դրամ կամ ավելի քան 250 մլն դոլար։ Միջոցները հիմնականում նախատեսված են օգտագործվել վերջին՝ 2027-2029-ին, իսկ սկզբնական փուլում լինելու են օրենսդրական լավարկումներ»,- հայտարարեց Պապոյանը։

Ռազմավարության իրականացման արդյունքում մինչև 2030-ը գործադիրը խոստանում է հետևյալ ազդեցության ցուցանիշները՝

• Տեղական արտահանումը կաճի 1,7 անգամ` հասնելով 16,9 մլրդ ԱՄՆ դոլարի` 9,3% միջին տարեկան աճով: Ըստ այդմ՝ ծառայությունների արտահանումը կհասնի 10,3 մլրդ ԱՄՆ դոլարի` 10,4% միջին տարեկան աճով, իսկ ապրանքների տեղական արտահանումը` 6,6 մլրդ ԱՄՆ դոլարի` 7,8% միջին տարեկան աճով:
• Տեղական արտահանման նպաստումը ՀՆԱ աճին կդառնա 2,92 տոկոսային կետ:
• Առևտրի հաշվեկշիռ (ընդամենը արտահանմամբ) ՀՆԱ հարաբերակցությունը 2030-ին կկազմի -6․27% (2019-ի – 13,34%-ի փոխարեն):
• Մինչև 2030-ը արտահանելի ոլորտների աճը կկազմի 10% (2023-ի 3,4%-ի փոխարեն):
• Տնտեսության արտահանելի ոլորտներում մեկ աշխատողի հաշվով համախառն ավելացված արժեքը 2030-ին կհասնի 18,6 միլիոն դրամի (2023-ի 14,4 միլիոն դրամի փոխարեն):

Պապոյանը նաև նշեց, որ կառավարության «Խաղաղության խաչմերուկ» հայեցակարգի իրագործումը կարող է էականորեն փոխել իրավիճակը։

«Եթե մենք խնդիրներ ունենք հայ-թուրքական սահմանի հետ, ապա պետք է խոսակցություն նախաձեռնենք, որպեսզի կարողանանք օգտվել թուրքական նավահանգիստներից»,- ասաց նախարարը։