Civilnet
ԱՄՆ պետքարտուղար Մարկո Ռուբիոն և Ֆրանսիայի արտաքին գործերի նախարար Ժան-Նուել Բարոն հուլիսի 4-ին հեռախոսազրույցի ընթացքում քննարկել են Հայաստան-Ադրբեջան խաղաղության ապահովման հարցը։ Այս մասին հայտնում են պետքարտուղարությունից։
Երկու երկրների գլխավոր դիվանագետները վերահաստատել են իրենց հանձնառությունը՝ ապահովելու, որ Իրանը երբեք չմշակի կամ ձեռք բերի միջուկային զենք: Նրանք նաև քննարկել են Գազայում մարդասիրական իրավիճակը և հրադադարի հասնելու ջանքերը, Ռուսաստան-Ուկրաինա պատերազմի ավարտը, ինչպես նաև Սուդանում շարունակվող հակամարտությունը:
Նախօրեին տեղեկություն տարածվեց, որ ուրբաթ օրը Սպիտակ Տանը ԱՄՆ նախագահ Դոնալդ Թրամփն ընդունելու է Հայաստանի և Ադրբեջանի ղեկավարներին։ Ըստ շրջանառվող լուրերի նախատեսվում է խաղաղության պայմանագրի ստորագրում։ Հայաստանի վարչապետի աշխատակազմից և արտաքին գործերի նախարարությունից ՍիվիլՆեթի հարցմանն ի պատասխան՝ ոչ հերքեցին, ոչ էլ հաստատեցին այս լուրը։
ԱՄՆ կոնգրեսական Ջո Ուիլսոնն էլ հայտարարել է, որ «երբեք չի եղել Դոնալդ Թրամփի նման խաղաղարար նախագահ»։ Իր հայտարարության մեջ նա թվարկել է այն երկրները, որոնց միջև, իր կարծիքով, Թրամփը նպաստել է խաղաղության հաստատմանը։ Նա նշել է, թե շուտով խաղաղություն կհաստատվի նաև Հայաստանի և Ադրբեջանի միջև։
Հուլիսի 19-ին ԱՄՆ նախագահ Դոնալդ Թրամփը հայտարարել էր, որ Երևանն ու Բաքուն խաղաղության շեմին են։
«Հայաստան, Ադրբեջան՝ մենք այնտեղ հրաշք ենք ստեղծել, և այն արդեն մոտ է նպատակին», – ասել էր ԱՄՆ նախագահը, վստահություն հայտնելով, որ խաղաղության համաձայնագրի ստորագրումը տեղի կունենա մոտ ապագայում։
Պատմություններ
