Հայաստանի նախագահն ու Իրանի փոխնախագահը քննարկել են Հյուսիս-Հարավի շինարարության ընթացքը

Հայաստանի նախագահ Վահագն Խաչատուրյանը և Իրանի փոխնախագահ Մոհամմադ Ռեզա Արեֆը քննարկել են Հյուսիս-Հարավ ճանապարհային միջանցքի Մեղրի-Քաջարան հատվածում իրանական կազմակերպության կողմից իրականացվող աշխատանքները՝ կարևորելով դրանց նշանակությունը տարածաշրջանային կապուղիների զարգացման գործում։ Այս մասին հայտնում են նախագահի աշխատակազմից։

Հայաստանի նախագահն ու Իրանի փոխնախագահը հանդիպել են Թուրքմենստանի Թուրքմենբաշի քաղաքում՝ «Դեպի ծով ելք չունեցող երկրների երրորդ համաժողովի» շրջանակում։

Կողմերն անդրադարձել են տնտեսության, էներգետիկայի, ենթակառուցվածքների, բարձր տեխնոլոգիաների և մի շարք այլ ոլորտներում համագործակցության ընդլայնման հեռանկարներին։  

Խաչատուրյանն ու  Մոհամմադ Ռեզա Արեֆը մտքեր են փոխանակել նաև տարածաշրջանային ընդհանուր իրավիճակի և զարգացումների շուրջ՝ ընդգծելով բարիդրացիության, փոխադարձ հարգանքի և խաղաղ համագոյակցության սկզբունքների ամրագրումը որպես կայունության և զարգացման հիմք ողջ տարածաշրջանի համար։