Թրամփն ասել է՝ պատրաստ է հանդիպել Պուտինի հետ
Civilnet
Սպիտակ տունը հայտարարել է, որ ԱՄՆ նախագահ Դոնալդ Թրամփը պատրաստակամ է հանդիպել Ռուսաստանի նախագահ Վլադիմիր Պուտինի և Ուկրաինայի նախագահ Վոլոդիմիր Զելենսկու հետ։
Սպիտակ տան խոսնակ Քերոլայն Լևիթը չորեքշաբթի հայտարարել է, որ ռուս պաշտոնյաները հայտնել են Թրամփի հետ հանդիպելու ցանկության մասին, և որ նախագահը բաց է երկկողմ կամ եռակողմ հանդիպման համար։
ՌԴ նախագահի օգնական Յուրի Ուշակովը հայտարարել է, որ ամերիկյան կողմի առաջարկով համաձայնեցվել է առաջիկա օրերին Պուտին-Թրամփ հանդիպում անցկացնել։
Լևիթը ճշտել է, որ հանդիպման ժամկետը և վայրը դեռ որոշված չեն։ AP-ն, հղում անելով Սպիտակ տան անանուն պաշտոնյայի, հաղորդել է, որ հանդիպումը կարող է տեղի ունենալ մոտակա շաբաթվա ընթացքում։ Թրամփը պատասխանել է դրական՝ նշելով․ «Շատ լավ հնարավորություններ կան, որ հանդիպում տեղի կունենա մոտ ժամանակներում»։
Սակայն երբ նրան հարցրել են հնարավոր հրադադարի մասին, Թրամփը զգուշավոր պատասխան է տվել. «Ես այս հարցում նախկինում էլ հիասթափվել եմ»։
Թրամփի՝ Ռուսաստանի գործերով հատուկ դեսպան Սթիվ Ուիթքոֆը նախօրեին այցելել էր Մոսկվա, հանդիպում ունեցել Պուտինի հետ։ Թրամփն այդ հանդիպումը «շատ արդյունավետ» է բնութագրել՝ գրելով, որ «մեծ առաջընթաց» է արձանագրվել։
Թրամփը պնդել է, որ Ուկրաինայում պատերազմը պետք է ավարտվի և նշել է, որ այս հարցում աշխատում է Եվրոպայի մի շարք դաշնակիցների հետ։ Նա նախատեսում է նախ հանդիպել Պուտինի, իսկ այնուհետև Զելենսկու հետ։
Պետքարտուղար Մարկո Ռուբիոն հայտարարել է, որ այժմ ԱՄՆ-ն ունի որոշակի պատկերացում այն պայմանների մասին, որոնք Ռուսաստանը կարող է ներկայացնել որպես պատերազմի դադարեցման նախապայմաններ։ Նրա խոսքով՝ «տարածքային հարցերը» առանցքային կլինեն ցանկացած պայմանավորվածության դեպքում։
AFP-ն հայտնում է, որ Թրամփը Զելենսկու հետ հեռախոսազրույցի ընթացքում քննարկել է նաև հնարավոր հանդիպման հարցը։ Զրույցին մասնակցել են նաև ՆԱՏՕ-ի գլխավոր քարտուղար Մարկ Ռյուտեն, Բրիտանիայի, Գերմանիայի և Ֆինլանդիայի առաջնորդները։
Պատմություններ
