Կառավարությունը վաճառում է «ՄՏՍ Հայաստան»-ի իր բաժնեմասը

Կառավարության որոշմամբ՝ վարչապետի աշխատակազմին թույլատրվել է «ՄՏՍ Հայաստան»-ում պետական բաժնետոմսերի վաճառքի օպցիոն պայմանագիր կնքել։

2024-ի փետրվարին ընդունված որոշմամբ՝ կառավարությունը որպես նվիրատվություն ստացել էր «ՄՏՍ Հայաստան»-ի 20 տոկոս  բաժնեմասը՝ 110,000 հատ բաժնետոմս՝ յուրաքանչյուրը 1,000 դրամ անվանական արժեքով։ Բաժնետոմսերի կառավարումը վստահված է Հայաստանի վարչապետի աշխատակազմին։

Ընկերության առաջարկի համաձայն՝ օպցիոն պայմանագրով նախատեսվում է, որ պետությունն իրավունք կստանա վաճառել իր բաժնետոմսերը «Ֆեդիլքո Գրուպ Լիմիթիդ»-ին՝ 50 մլն դոլար ընդհանուր արժեքով։ Վճարումը պետք է կատարվի օպցիոնի իրացման ծանուցումից հետո՝ առավելագույնը 90 օրվա ընթացքում։

Որոշման մեջ նշվում է, որ այս որոշումը համահունչ է Կառավարության 2021–2026 թվականների ծրագրով նախատեսված պետական գույքի արդյունավետ կառավարման նպատակներին։