Civilnet
Ֆրանսիայի արտաքին գործերի նախարարությունը ողջունել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև Վաշինգտոնում ձեռք բերված համաձայնությունը՝ ուղղված երկու երկրների հարաբերությունների կարգավորմանը։
Հայտարարությունում նշվում է, որ համաձայնությունն իրականացվել է նախագահ Դոնալդ Թրամփի հովանու ներքո, և Ֆրանսիան այն համարում է «որոշիչ առաջընթաց», որը ձեռք է բերվել Միացյալ Նահանգների ակտիվ ներգրավվածությամբ։
«Հայաստանի և Ադրբեջանի միջև Խաղաղության պայմանագրի հնարավորինս շուտ ստորագրումն ու վավերացումն անհրաժեշտ է՝ այս գործընթացը լիարժեք ավարտին հասցնելու համար», - ասված է Ֆրանսիայի ԱԳՆ հայտարարության մեջ։
Հայտարարության մեջ նաև նշված է, որ Ֆրանսիան աջակցում է կողմերի համատեղ կոչին՝ ԵԱՀԿ Մինսկի խմբի կառույցների լուծարման գործընթաց սկսելու վերաբերյալ։
Հայտարարությունում ընդգծվում է, որ հարաբերությունների կարգավորումը, տարածաշրջանային կապուղիների զարգացումը և սահմանների վերաբացումը՝ հիմնված պետությունների տարածքային ամբողջականության, ինքնիշխանության և 1991-ի Ալմա-Աթայի հռչակագրով ամրագրված սկզբունքների վրա, պետք է նպաստեն Հարավային Կովկասում խաղաղության և բարեկեցության հաստատմանը։
Ֆրանսիան վստահեցնում է, որ իր եվրոպացի գործընկերների հետ միասին կշարունակի ակտիվորեն նպաստել այդ գործընթացին՝ հատկապես Եվրոպական քաղաքական համայնքի շրջանակում։
Պատմություններ
