Civilnet
ԵՄ մոնիթորինգային առաքելությունը Հայաստանում կշարունակի իր գործունեությունը, և դրա մանդատի հնարավոր փոփոխությունները կքննարկվեն Երևանի և Բրյուսելի միջև։ Այս մասին ադրբեջանական Repoert-ին ասել է ԵՄ արտաքին քաղաքականության խոսնակ Անիտա Հիփերը։
«Առաքելության մանդատն է հետևել և հաշվետվություն ներկայացնել հայ-ադրբեջանական սահմանի հայկական կողմում տեղում ստեղծված իրավիճակի վերաբերյալ», - ասել է ԵՄ ներկայացուցիչը՝ նշելով, որ Եվրամիությունը ողջունում է Ադրբեջանի և Հայաստանի միջև խաղաղության պայմանագրի նախաստորագրումը և կոչ է արել կողմերին հնարավորինս շուտ ստորագրել և վավերացնել այն։
Հայաստանի և Ադրբեջանի միջև նախաստորագրված խաղաղության համաձայնագրի 7-րդ կետում նշված է․ «Կողմերը որևէ երրորդ կողմի ուժեր իրենց համատեղ սահմանի երկայնքով չեն տեղակայի։ Կողմերը, մինչև իրենց փոխադարձ սահմանի սահմանազատումը և դրան հաջորդող սահմանագծումը, կիրականացնեն անվտանգության և վստահության ամրապնդման փոխհամաձայնեցված միջոցներ, այդ թվում՝ ռազմական ոլորտում՝ սահմանամերձ շրջաններում անվտանգությունն ու կայունությունն ապահովելու նպատակով»։
Մինչ խաղաղության պայմանագրի նախաստորագրումն Ադրբեջանը պահանջում էր հայ-ադրբեջանական սահմանի՝ Հայաստանի սուվերեն տարածքից դուրս բերել ԵՄ դիտորդական քաղաքացիական առաքելությունը՝ համարելով այն երրորդ ուժ։
Ավելի վաղ Հայաստանի փոխարտգործնախարար Պարույր Հովհաննիսյանն էլ հայտարարել էր, եթե խաղաղության համաձայնագիրը ստորագրվի, և իսկապես կայուն խաղաղություն լինի Հայաստանի և Ադրբեջանի միջև, ԵՄ դիտորդների համար կարող ենք նոր մանդատ քննարկել։
Պատմություններ
