Civilnet
Անկախ պետությունների համագործակցությունն ակնկալում է, որ Վաշինգտոնում Հայաստանի և Ադրբեջանի կողմից ստորագրված փաստաթղթերը կդառնան խաղաղության համաձայնագրի կնքման հիմք։ Այս մասին հայտարարել է ԱՊՀ գլխավոր քարտուղար Սերգեյ Լեբեդևը կազմակերպության կանոնադրական և այլ մարմինների մշտական ներկայացուցիչների խորհրդի նիստում։
Նրա խոսքով՝ Համագործակցության երկրները գոհ են եղել Երևանի և Բաքվի համատեղ հայտարարությունից՝ այն համարելով կարևոր քայլ տարաձայնությունների լուծման և խաղաղության համաձայնագրի ստորագրման ուղղությամբ։
«Ինչպես մենք բոլորս Համագործակցության երկրներում գոհ էինք Ղրղզստանի և Տաջիկստանի միջև միջպետական սահմանի վերաբերյալ պայմանագրի ստորագրումից, այնպես էլ հիմա մենք՝ Համագործակցության երկրներում, շատ գոհ ենք այս համատեղ հռչակագրի ստորագրումից։ Մենք կարծում ենք, որ սա տարաձայնությունների վերջնական կարգավորման և Ադրբեջանի ու Հայաստանի միջև խաղաղության պայմանագրի կնքման ճանապարհին եղած փուլերից մեկն է», - ասել է նա։
Լեբեդևը հույս է հայտնել, որ խաղաղության համաձայնագիրը հնարավորություն կտա Հայաստանին և Ադրբեջանին ակտիվորեն մասնակցել ԱՊՀ աշխատանքներին և կապահովի կազմակերպության բարձրագույն մարմինների նիստերի ավելի համապարփակ անցկացումն իրենց տարածքում։
Սեպտեմբերի 29-ին Մինսկում տեղի կունենա ԱՊՀ երկրների կառավարությունների ղեկավարների հանդիպումը։
Պատմություններ
