Civilnet
«Հրազդան» մարզադաշտի հարևանությամբ կկառուցվի Ալբերտ Ազարյանի անվան մարզադպրոց։ Մարզադպրոցի կառուցման նպատակով Կառավարությունը հատկացրել է 6,9 մլրդ դրամ։ Այս մասին հայտնում են Կռավարարությունից։
Օգոստոսի 25-ին տեղի է ունեցել մարզադպրոցի հիմնարկեքի արարողությունը, որին մասնակցել են վարչապետ Նիկոլ Փաշինյանը:
Կառուցման համար հատկացված բյուջեն ներառում է նոր մարզադպրոցի նախագիծը, շինարարական աշխատանքները, հեղինակային և տեխնիկական հսկողությունը, սպորտային սարքավորումները, ներքին հարդարանքը և ենթակառուցվածքների ձևավորումը։ Մարզադպրոցը կունենա հատուկ մարզատեսակների (գեղարվեստական մարմնամարզություն և ակրոբատիկա) մարզասրահ, ունիվերսալ մարզադահլիճ՝ տրիբունայով՝ 532 հանդիսատեսի համար, կենցաղային տարածքներ, հանդերձարաններ և սանհանգույցներ, վարչական և սպասարկման տարածքներ, ավտոկայանատեղի՝ 88 մեքենայի համար, տեխնիկական տարածք, գույքի պահեստներ և արհեստանոց, ջեռուցման և օդափոխության համակարգ՝ առանձին սենյակների համար կարգավորումներով։
Նախատեսվում է մարզադպրոցի շինաշխատանքներն ավարտին հասցնել 2026-ի նոյեմբերին։
Նոր մարզադպրոցը կդառնա շուրջ 300 պատանի և երիտասարդ մարզիկների պատրաստման ժամանակակից՝ միջազգային չափանիշներին համապատասխանող կենտրոն։ Համալիրում հնարավոր կլինի անցկացնել նաև միջազգային մրցաշարեր՝ ամրապնդելով Հայաստանի դիրքը և հեղինակությունը մարմնամարզության և սպորտի աշխարհում։
Նոր համալիրը նաև կհյուրընկալի 2027-ին Հայաստանում առաջին անգամ անցկացվելիք Մարմնամարզության Եվրոպայի առաջնությունը՝ լիարժեք ենթակառուցվածքային պատրաստվածությամբ։
Պատմություններ
