Civilnet
Իսրայելի վարչապետ Բենիամին Նեթանյահուն երեքշաբթի առաջին անգամ հայտարարել է, որ ճանաչում է Օսմանյան կայսրության իրականացրած ցեղասպանությունը հայերի, ասորիների և հույների նկատմամբ 20-րդ դարի սկզբում, հաղորդում է Times of Israel-ը:
Պոդքասթավար Պատրիկ Բեթ-Դևիդի հարցին, թե ինչու Իսրայելը չի ճանաչում Հայոց ցեղասպանությունը, Նեթանյահուն պատասխանել է․ «Կարծում եմ՝ ճանաչում ենք։ Քնեսեթն ընդունել է այդ մասին բանաձև», թեև նման օրենսդրական ակտ չի ընդունվել։ Հարցին, թե ինչու Իսրայելի ոչ մի վարչապետ մինչ այժմ չի ճանաչել ցեղասպանությունը, Նեթանյահուն պատասխանել է․ «Հենց նոր արեցի։ Ահա ձեզ»։
Հայոց ցեղասպանությունը մինչ օրս միայն 34 կառավարություն է ճանաչել ։
Իսրայելը երկար տարիներ Անկարային դիտում էր որպես կարևոր առևտրային և երբեմն անվտանգության գործընկեր և մնում էր այդ մեծամասնության շարքում։ Սակայն Գազայի ընթացիկ ճգնաժամի պայմաններում երկու երկրների հարաբերությունները հասել են աննախադեպ ցածր մակարդակի։ Թուրքիայի նախագահ Ռեջեփ Թայիփ Էրդողանը համարվում է ՀԱՄԱՍ-ի բացահայտ աջակից և Իսրայելի գլխավոր քննադատներից աշխարհում։
Times of Israel-ը գրում է, որ Իսրայելում շատերը կարծում են, որ Հոլոքոստի եզակի բնույթը խանգարում է իրենց ճանաչելու Հայոց ցեղասպանությունը՝ մտավախությամբ, որ դա կարող է Երկրորդ համաշխարհային պատերազմի ժամանակ մեկ երրորդ հրեաների համակարգված բնաջնջումը դնել պատմության ընթացքում տեղի ունեցած այլ ցեղասպանությունների շարքում։
Տե՛ս նաև՝
Իսրայելը չի ճանաչել Հայոց ցեղասպանությունը. Նեթանյահուն սխալվում է
Պատմություններ
