Civilnet
Եթե Հայաստանի խորհրդարանական ընտրություններից առաջ ուժեղ արտաքին միջամտություն լինի, ապա դա կարող է խախտել Երևանի հետ նախկինում համաձայնեցված հարցերը։ Այս մասին հայտարարել է Ադրբեջանի նախագահ Իլհամ Ալիևը «Ալ-Արաբիա» հեռուստաալիքին տված հարցազրույցում՝ անդրադառնալով Հայաստանի հետ խաղաղության գործընթացին։
Ըստ Ալիևի՝ Վաշինգտոնում ձեռք բերված պայմանավորվածությունները Հայաստանի համար խաղաղության և կայուն զարգացման երաշխիք են։
Ադրբեջանի նախագահը հույս է հայտնել, որ գործընթացին ոչինչ չի խանգարի, սակայն ընդգծել է, որ բացարձակ երաշխիքներ չունի՝ պատճառաբանելով, որ «շատ լավ ծանոթ չէ Հայաստանի ներքին քաղաքականությանը»։
Նա անդրադարձել է Հայաստանում սպասվող ներքաղաքական զարգացումներին, մասնավորապես՝ հաջորդ տարվա խորհրդարանական ընտրություններին և սահմանադրական փոփոխությունների գործընթացին։ Ալիևի խոսքով՝ «ուժեղ արտաքին միջամտության» դեպքում հնարավոր է նախկինում համաձայնեցված հարցերի խախտում, ինչը, սակայն, «շատ կվնասի հենց Հայաստանին»։
«Անկախ նրանից, թե ով է ստորագրել փաստաթղթերը Վաշինգտոնում, դրանք ստորագրվել են Հայաստանի անունից՝ Հայաստանի ղեկավարի կողմից։ Եթե այնտեղ ինչ-որ բան փոխվի, և նրանք հետ կանգնեն ստորագրվածից, դա լրջորեն կվատթարացնի Հայաստանի և Միացյալ Նահանգների հարաբերությունները», - նշել է Ալիևը։
Ադրբեջանի նախագահը շեշտել է, որ խաղաղ գործընթացին աջակցել է ոչ միայն ԱՄՆ-ը, այլև ողջ միջազգային հանրությունը՝ ներառյալ Եվրոպական միությունը, Թուրքիան և արաբական երկրները։
«Այդ համաձայնագրի խախտումը կնշանակի գնալ ընդդեմ ամբողջ աշխարհի։ Իսկ ի՞նչ կշահեն նրանք դրանից», - ասել է Իլհամ Ալիևը՝ նշելով, թե Ադրբեջանը դրական է տրամադրված գործընթացի շարունակության հարցում։
Պատմություններ
