Հայաստանն ու Չինաստանը կկարգավորեն ավտոմոբիլային փոխադրումները

Հայաստանի կառավարությունը հավանություն է տվել Չինաստանի հետ միջազգային ավտոմոբիլային ուղևորափոխադրումների և բեռնափոխադրումների մասին համաձայնագրի ստորագրմանը՝ նպատակ ունենալով կարգավորել երկու երկրների միջև ճանապարհային փոխադրումների ոլորտը և խթանել տնտեսական համագործակցությունը։

Պաշտոնական հիմնավորման համաձայն, այս պահին կանոնակարգված չեն Հայաստան–Չինաստան ավտոմոբիլային փոխադրումները, ինչը խոչընդոտում է փոխադրումների իրականացմանն ու տնտեսական համագործակցությանը:

Նոր համաձայնագիրը նախատեսում է ստեղծել իրավական հիմք երկու երկրների միջև ավտոմոբիլային տրանսպորտով կանոնավոր և ոչ կանոնավոր ուղևորափոխադրումների ու բեռնափոխադրումների համար՝ համապատասխան միջազգային համաձայնագրերին և երկու պետությունների օրենսդրություններին:

Կառավարության հիմնավորման մեջ նշված է, որ նախաձեռնությունը կնպաստի փոխշահավետ տնտեսական կապերի խորացմանը, ավտոմոբիլային փոխադրումների զարգացմանը և միջազգային տրանսպորտային միջանցքներում համագործակցության ընդլայնմանը:

Համաձայնագրի ստորագրումն իրականացվում է Հայաստանի կառավարության արտաքին քաղաքականության առաջնահերթությունների շրջանակում՝ նախատեսված ՀՀ-ՉԺՀ քաղաքական երկխոսության և տնտեսական կապերի խորացման միջոցառումների մասով: