Civilnet
Շատ աշխատանքներ, որոնք մշակվել էին Մինսկի խմբի շրջանակներում և վերաբերում էին կարգավորման սկզբունքներին ու մեթոդներին, իրենց ներդրումն են ունեցել տարածաշրջանում խաղաղության և կայունության վերականգնման գործում. սեպտեմբերի 4-ի ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ Մոսկվան համարում է, որ ԵԱՀԿ Մինսկի խմբի լուծարումը Ղարաբաղյան կարգավորման հարցում հիմնավորված է՝ հաշվի առնելով տարածաշրջանում տեղի ունեցած արմատական փոփոխությունները։
«Մենք այս քայլը համարում ենք հիմնավորված և արդարացված՝ տարածաշրջանում տեղի ունեցած արմատական փոփոխությունների պայմաններում», – ասել է Զախարովան։
Նրա խոսքով՝ խմբի ամբողջ գործունեության ընթացքում Ռուսաստանը գործադրել է առավելագույն ջանքեր՝ իր առջև դրված խնդիրների լուծման համար, ի նպաստ Ռուսաստանի բարեկամ ժողովուրդների՝ Հայաստանի և Ադրբեջանի հաշտեցման։
«Մինսկի խմբի բազմաթիվ մշակված գաղափարներ, որոնք վերաբերում էին կարգավորման սկզբունքներին ու մեթոդներին, այս կամ այն ձևով կիրառվել են տարբեր միջազգային հարթակներում և ներդրում են ունեցել տարածաշրջանում խաղաղության ու կայունության վերականգնման գործում», – ընդգծել է ՌԴ արտաքին քաղաքական գերատեսչության պաշտոնական ներկայացուցիչը։
Սեպտեմբերի 1-ին ԵԱՀԿ նախարարների խորհուրդը որոշել է լուծարել Մինսկի խումբը։ Նախարարների խորհրդի որոշումը ընդունվել է ԵԱՀԿ 57 մասնակից պետությունների կոնսենսուսով։
Օգոստոսի 8-ին Վաշինգտոնում Հայաստանի ու Ադրբեջանի արտգործնախարարները ստորագրել են ԵԱՀԿ Մինսկի խումբը լուծարելու մասին դիմում՝ կոչ անելով ԵԱՀԿ բոլոր մասնակից պետություններին ընդունել այս որոշումը։
Պատմություններ
