Բայրամովը Պետդեպի ներկայացուցչի հետ քննարկել է խաղաղության գործընթացը

Ադրբեջանի արտգործնախարար Ջեյհուն Բայրամովը ընդունել է ԱՄՆ Պետդեպարտամենտի Եվրոպայի և Եվրասիայի հարցերով գլխավոր ներկայացուցչին՝ Բրենդան Հանրահանին։

Ըստ Ադրբեջանի ԱԳՆ հաղորդագրության՝ հանդիպման ընթացքում քննարկվել են ադրբեջանա-ամերիկյան հարաբերությունները, ռազմավարական գործընկերության խարտիայի պատրաստման համար ստեղծված ռազմավարական աշխատանքային խմբի վերաբերյալ փոխըմբռնման հուշագրից բխող հարցերը, Ադրբեջանի և Հայաստանի միջև հարաբերությունների կարգավորման գործընթացը, ինչպես նաև տարածաշրջանային ու միջազգային անվտանգության օրակարգային խնդիրներ, որոնք ներկայացնում են փոխադարձ հետաքրքրություն։

Կողմերը մտքեր են փոխանակել երկկողմ հարաբերությունների բազմամյա պատմության և փոխշահավետ համագործակցության շուրջ, այդ թվում՝ անվտանգության և էներգետիկայի ոլորտներում։

«Առանձնապես ընդգծվել է այս տարվա օգոստոսին կայացած բարձր մակարդակի այցելությունների և շփումների նշանակությունը երկկողմ հարաբերությունների զարգացման գործում։ Նշվել է նաև Վաշինգտոնում Ադրբեջանի նախաձեռնությամբ ձեռք բերված պատմական պայմանավորվածությունների կարևորությունը՝ ուղղված Ադրբեջանի և Հայաստանի միջև խաղաղ օրակարգի առաջմղմանը, ներառյալ խաղաղության համաձայնագրի նախաստորագրումն ու հակամարտությունից հետո մնացած կառույցների լուծարումը։ Կողմերը քննարկել են նաև փոխադարձ հետաքրքրություն ներկայացնող այլ հարցեր», - հայտնում է Ադրբեջանի ԱԳՆ-ն։