Civilnet
Հայաստանի տարածքում չի կարող լինել «Զանգեզուրի միջանցք» անունով ենթակառուցվածք։ Այդ մասին Ազգային ժողովում սեպտեմբերի 10-ին հայտարարեց վարչապետ Նիկոլ Փաշինյանը՝ իր խոսքում չօգտագործելով ադրբեջանական եզրույթը և հղում անելով ՔՊ-ական պատգամավոր Արուսյակ Ջուլհակյանի հարցին։
Պատգամավորը վարչապետին հարցրեց, թե արդյոք կառավարությունն անհանգստացած չէ Իլհամ Ալիևի հայտարարություններով, որտեղ նորից հիշատակվում է այսպես կոչված «Զանգեզուրի միջանցք» արտահայտությունը։
Ի պատասխան՝ Փաշինյանը նշեց, որ գոյություն ունի օբյեկտիվ իրականություն և գոյություն ունեն սուբյեկտիվ ընկալումներ։
«Հիմա ո՞րն է օբյեկտիվ իրականությունը։ Օբյեկտիվ իրականությունը հետևյալն է, որ Հայաստանը և Ադրբեջանը Վաշինգտոնում ևս մեկ անգամ ճանաչել են միմյանց տարածքային ամբողջականությունը, ինքնիշխանությունը, իրավազորությունը, սահմանների անխախտելիությունը։ Սրանից բխում է, որ Հայաստանի Հանրապետության տարածքով կարող են գոյություն ունենալ այնպիսի կապուղիներ, որոնց վերաբերյալ որոշում է կայացնում Հայաստանի Հանրապետությունը, և որոնց շուրջ ձեռք են բերվել կամ կբերվեն պայմանավորվածություններ»,- ասաց նա։
Փաշինյանն ասաց, որ էական չէ, թե ինչ են խոսում Ադրբեջանում, քանի որ կա փաստաթուղթ, որտեղ ամեն ինչ գրված է սևով սպիտակի վրա։
Նա նշեց, որ պատգամավորի հիշատակած տերմինաբանությունը՝ «Զանգեզուրի միջանցքը», կապ չունի Հայաստանի ստանձնած պարտավորությունների հետ և, առավել ևս, այժմ կապ չունի՝ հենց Վաշինգտոնում ստորագրված փաստաթղթի ուժով։
Պատմություններ
