Civilnet
Հայաստանն իրականացնում է ազգային նարատիվների և խորհրդանիշների վերափոխում՝ արտաքին սպառնալիքները նվազեցնելու և պետական անվտանգության համակարգի վրա ճնշումը թուլացնելու համար. այդ մասին հայտարարեց Հայաստանի Անվտանգության խորհրդի քարտուղար Արմեն Գրիգորյանը սեպտեմբերի 15-ին «Կանայք և գլոբալ անվտանգության ճարտարապետություն» (WGSA) կազմակերպության հրավիրած «Համապարփակ անվտանգության և դիմադրողականության միջազգային համաժողով – 2025»-ի ժամանակ:
Պատասխանելով ՍիվիլՆեթի հարցին, թե ինչպես են ազգային ինքնությանը վերաբերող զգայուն թեմաների՝ այդ թվում Արարատ լեռան պատկերը սահմանային կնիքներից հանելու շուրջ քննարկումներն ազդում ներքին դիմադրողականության վրա, Գրիգորյանը նշեց, որ այդ գործընթացները երկրի համապարփակ անվտանգությունն ապահովելու «անհրաժեշտ ճանապարհ» են։
«Եթե մենք խաղաղության ճանապարհով ենք ընթանում, հարցեր կան, որոնց պետք է անդրադառնանք», - ասաց նա՝ վկայակոչելով վարչապետ Նիկոլ Փաշինյանի այն օրինակը, թե ինչպես «բնակարան կառուցելիս պատերին չես կախում նկարներ, որոնք կարող են հարևանի մոտ այլ էմոցիաներ առաջացնել»։
Անվտանգության խորհրդի քարտուղարի խոսքով՝ այս բանավեճերի հանրային և թափանցիկ բնույթը ոչ թե թուլացնում, այլ ուժեղացնում է ներքին դիմադրողականությունը, քանի որ «որևէ գաղտնի գործընթաց գոյություն չունի»։
Թեպետ Հայաստանի սահմանահատման կնիքից Արարատ լեռան պատկերի հեռացման մասին սեպտեմբերի 11-ի կառավարության որոշումը գաղտնի չի եղել, սակայն ընդգրկված է եղել չզեկուցվող հարցերի փաթեթում, որը պոստֆակտում բարձրաձայնել են մամուլն ու ընդդիմադիրները:
Ըստ Արմեն Գրիգորյանի՝ հանրությունն ունի իր կարծիքն արտահայտելու բազմաթիվ միջոցներ, որոնցից մեկն էլ առաջիկա ընտրություններն են լինելու։
Անդրադառնալով այն դիտարկմանը, թե արդյոք Հայաստանի ազգային նարատիվը ձևավորման փուլում է, Գրիգորյանը պատասխանեց. «Ե՛վ ձևավորման, և՛ վերափոխման»։
«Եկե՛ք անկեղծ լինենք, մենք էլ որպես հասարակություն ունեցել ենք այն նույն նարատիվները, որոնք գոյություն են ունեցել հայ հասարակությունում։ Մեր անվտանգության սպառնալիքները մեզ ստիպել են վերագնահատել դրանք», - ասաց նա։
Անվտանգության խորհրդի քարտուղարը շեշտեց՝ այս փոփոխությունների հիմնական նպատակն է «քայլ առ քայլ հանել» այն ամենը, ինչը կարող է որպես սպառնալիք ընկալվել՝ դրանով իսկ թեթևացնելով անվտանգության համակարգի բեռը, քանի որ «համակարգի վրա անվերջ ճնշումը կարող է անդառնալի բացասական հետևանքներ ունենալ»։
Արշալույս Մղդեսյան
Պատմություններ
