Արցախի նախկին պաշտոնյային մահացած են գտել Պետերբուրգում ՀՀ հյուպատոսության զուգարանում 

Արցախի նախագահի հատուկ հանձնարարությունների գծով նախկին ներկայացուցիչ Բորիս Ավագյանին մահացած են գտել Սանկտ Պետերբուրգում Հայաստանի հյուպատոսության զուգարանում։ Ռուսաստանի իրավապահները «ՌԻԱ Նովոստի»-ին հայտնել են, որ Ավագյանը հավանաբար ինքնասպան է եղել։

Սեպտեմբերի 23-ին Ավագյանը կապ էր հաստատել «Փաստինֆո»-ի հետ ու հայտնել, որ կամավոր ներկայացել է Սանկտ Պետերբուրգի ՀՀ հյուպատոսություն և ցանկություն հայտնել արտահանձնվել Հայաստանին։

«Վերջին մեկ ամսվա ընթացքում ինձ ձերբակալել են ՌԴ ոստիկանության հատուկ գնդի աշխատակիցները, տարել ոստիկանություն փաստաթղթերս ստուգելու համար, որովհետև Հայաստանը ինձ հետախուզում էր հայտարարել»,- հայտարարել է նա։ 

Ավագյանը ցանկություն էր հայտնել արտահանձնվել Հայաստան, որտեղ նրա նկատմամբ հետախուզում էր հայտարարվել՝ պետական սահմանն ապօրինի հատելու և փողերի լվացման մեղադրանքով։ 

«Թող ձերբակալեն և հետաքննություն իրականացնեն, իսկ հետո դատարանը թող որոշի՝ ես մեղավոր եմ, թե ոչ»,- ասել է Ավագյանը։

Նույն օրը՝ սեպտեմբերի 23-ին, Սանկտ Պետերբուրգի դատարանների մամուլի ծառայության ղեկավար Դարյա Լեբեդևան ռուսական ՌԲԿ-ին հայտնել էր, որ Սանկտ Պետերբուրգի Կրոնշտադտի շրջանային դատարանը «Ռոսռեեստր» և «Ռոսիմուշչեստվո» տարածաշրջանային գրասենյակների նախկին պաշտոնյա Բորիս Ավագյանի նկատմամբ հետախուզում է հայտարարել մաքսային վճարումներից խուսափելու համար։ Ըստ Լեբեդևի՝ Ավագյանը փախել է դատարանից «ծխելու» պատրվակով:

Լրատվամիջոցը հայտնում է, որ Ավագյանն ապաստան է գտել Սանկտ Պետերբուրգի Հայաստանի հյուպատոսությունում։  Ավագյանը ձերբակալվել էր սեպտեմբերի 17-ին Սանկտ Պետերբուրգի կենտրոնում։