Մոլդովայի եվրոպամետ կուսակցությունն ընտրություններում հաղթում է ռուսամետ ընդդիմությանը

Մոլդովայի խորհրդարանական ընտրությունների արդյունքում եվրոպամետ «Գործողություն և համերաշխություն» կուսակցությունը (PAS) նախնական արդյունքներով առավելագույն ձայներն է ստացել։

Ընտրությունները, որոնք կայացել են սեպտեմբերի 28-ին, դիտորդների և քաղաքական գործիչների կողմից դիտարկվում էին որպես կարևոր իրադարձություն Մոլդովայի անկախացումից ի վեր։ Քվեարկությունը ներկայացվում է որպես ընտրություն՝ եվրոպական ինտեգրման և Ռուսաստանի հետ մերձեցման ուղիների միջև։

Մոլդովայի Կենտրոնական ընտրական հանձնաժողովի հրապարակած նախնական տվյալներով՝ երկուշաբթի վաղ առավոտյան, երբ հաշվարկված էր ձայների ավելի քան 99 տոկոսը, «Գործողություն և համերաշխություն»-ը ստացել է 50,05 տոկոս, իսկ ռուսամետ «Հայրենասիրական դաշինքը»՝ 24,3 տոկոս։

«Գործողություն և համերաշխություն» կուսակցությանը, որի ղեկավարն է նախագահ Մայա Սանդուն, կառավարություն կազմելու համար անհրաժեշտ է խորհրդարանի 101 մանդատներից առնվազն 51-ը։  

Պաշտոնական վերջնական տվյալները նախատեսվում է հրապարակել այսօր՝ ավելի ուշ։

Սանդուն կիրակի օրը մայրաքաղաք Քիշնևում իր քվեարկության ժամանակ ասել է, որ Մոլդովայի համար այս ընտրությունները վճռորոշ են։

«Մոլդովան հնարավորություն կունենա շարունակել ամրապնդել իր ժողովրդավարությունը, պաշտպանել իր տարածքը և շարունակել ԵՄ ինտեգրման իր ուղին», - ասել է նա։

Միևնույն ժամանակ, «Հայրենասիրական դաշինք» կոալիցիայի ղեկավար Իգոր Դոդոնը, որը Սանդուից առաջ Մոլդովայի նախագահն էր, կոչ է արել ընտրությունների հաջորդ օրը բողոքի ցույցեր անցկացնել խորհրդարանի առջև։

Սառը պատերազմի ավարտից հետո Մոլդովան տատանվել է արևմտյան և ռուսամետ ուղղությունների միջև։ Ռուսաստանը փոքր զորախումբ ունի Մոլդովոյից անջատված և Մոսկվայի աջակցությունը վայելող Մերձդնեստրում։

Մոլդովայում 2021-ից իշխում է Սանդուի արևմտամետ կուսակցությունը։