Civilnet
Սեպտեմբերի 30-ից հոկտեմբերի 5-ը Հայաստանում կանցկացվի ամենախոշոր գիտության և տեխնոլոգիաների հանրահռչակման միջոցառումը՝ Գիտության շաբաթ․ Հայաստան 2025-ը։ Այս տարվա կարգախոսն է «Զարգացնել գիտությամբ», իսկ կենտրոնական միջոցառումը՝ Գիտության փառատոնը, տեղի կունենա Ազատության հրապարակում։
Փառատոնը նպատակ ունի ներգրավել շուրջ 50,000 այցելու և մոտ 300 դպրոց ու մանկապարտեզ՝ ապակենտրոնացված միջոցառումներով՝ Երևանում և ՀՀ մարզերում։
Միջոցառման շրջանակում Ազատության հրապարակում ներկայացվելու են գիտության, տեխնոլոգիաների, ճարտարագիտության, գիտական ֆանտաստիկայի և արվեստի միաձուլված նախագծեր։ Մասնակցելու են ինչպես պետական ու ակադեմիական հաստատություններ, այնպես էլ տեխնոլոգիական և ստեղծարար կազմակերպություններ։
Թեմատիկ օրերը բաժանված են երեք ուղղությամբ՝
- Սեպտ. 30 – հոկտ. 1․ «Զարգացնել գիտությամբ»՝ գիտական ինստիտուտների ցուցադրություններով, փորձերով և նախագծերով։
- Հոկտ. 2–3․ «Ինչու դառնալ գիտնական ու ճարտարագետ»՝ մասնագիտական կողմնորոշման օրեր համալսարանների, լաբորատորիաների և նորարարների մասնակցությամբ։
- Հոկտ. 4–5․ «Ընդլայնելով երևակայությունը»՝ գիտաֆանտաստիկայի, արվեստի և խաղերի համադրությամբ։
Նույն շաբաթվա ընթացքում ՀՀ մարզերի դպրոցներում և մանկապարտեզներում կանցկացվեն գիտական խաղեր, ցուցադրություններ և փորձեր։ Դրանք կանցկացվեն հատուկ մշակված ծրագրով՝ խթանելու երեխաների հետաքրքրությունը գիտության և տեխնոլոգիաների հանդեպ։
Պատմություններ
