Civilnet
Հայաստանում համապարփակ առողջապահական ապահովագրության բարեփոխումը կմեկնարկի 2026-ից։ Այս մասին ասուլիսում հայտարարեց առողջապահության նախարար Անահիտ Ավանեսյանը՝ նշելով, որ բարեփոխման ֆինանսական հաշվարկներն արդեն ներառված են 2026-ի բյուջեում։
Նախարարը տեղեկացրեց, որ լրամշակված օրենսդրական փաթեթն արդեն տեղադրվել է e-draft համակարգում։
Նախարարի խոսքով՝ ապահովագրության ներդրումը լինելու է փուլային և կտևի երեք տարի։ 2026-ից համակարգում կընդգրկվեն մի քանի խմբեր։
«Մինչև 18 տարեկան երեխաները պետության 100% սուբսիդավորմամբ կներառվեն ապահովագրության համակարգ»,- ներկայացրեց նախարարը։
Համակարգում կներառվեն նաև 65 տարին լրացած քաղաքացիները։
2026-ից ծրագրից կօգտվեն նաև 18-ից 65 տարեկան հաշմանդամություն ունեցող անձինք և անապահովության 28 և ավելի միավոր ունեցող քաղաքացիները։
Ավանեսյանը նշեց, որ առաջին փուլում կընդգրկվեն նաև ամսական 200,000 դրամ և ավելի եկամուտ ունեցող անձինք, որոնց թիվը կազմում է մոտ 190 հազար։ Նա հիշեցրեց, որ նախկինում քննարկվում էր 300,000 կամ 500,000 դրամի շեմը, սակայն որոշվել է սանդղակն իջեցնել։
Ընդհանուր առմամբ, 2026-ին ծրագիրը կվերաբերի մոտ 1 մլն 600 հազար մարդու։ Նախարարը շեշտեց, որ պետության կողմից 100% սուբսիդավորվող ծառայություններից կկարողանան օգտվել միայն ռեզիդենտ հանդիսացող ՀՀ քաղաքացիները։
«Հայաստանում 183 օր ապրելու պահանջը ֆիքսված է օրենքում»,- պարզաբանեց Ավանեսյանը։
Ապահովագրական փաթեթի արժեքը սահմանվել է 129,600 դրամի շրջանակում։ Այն ներառելու է կանխարգելիչ սկրինինգային ծրագրեր, հիվանդանոցային ծառայություններ, դեղորայքային ապահովում և շտապօգնություն։ Նախարարի խոսքով՝ ծառայությունների ցանկը հստակ կսահմանվի կառավարության որոշմամբ, որպեսզի քաղաքացիների համար ամեն ինչ պարզ լինի։
«Կառավարության որոշմամբ հստակ ծառայությունները ամրագրված են լինելու, և ամեն քաղաքացի շատ պարզ ձևով տեսնելու է, թե այս ծառայությունը ապահովագրության շրջանակներում փակվում է, թե ոչ»,- վստահեցրեց նա։
Կլինի մեկ բազային փաթեթ, որին ի լրումն մասնավոր ընկերությունները կկարողանան առաջարկել հավելյալ ծառայություններով փաթեթներ։
Պատմություններ
